سوريه دولت اخبارات آژانسی (سانا) نینگ خبر بېریشیچه، مملکت پایتختیدهگی کافهلردن بیریده یوز بېرگن پارتلش عاقبتیده کمیده تۉرت کیشی جان بېرگن و ینه۱۱کیشی یرهلنگن.
اوشبو نشرگه کۉره، پارتلش بوگون (پنجشنبه، ۱۱-سرطان) دَمشق نینگ «النصر» کۉچهسیده، «الحجاز» حدودیده صادر بۉلگن. رویترز خبرگزارلیگی سوريه دولت تلویزیونیگه تهیهنیب، اۉلگنلر سانینی بېش کیشی، یرهدارلر سانینی اېسه۱۶ نفر دېب معلوم قیلگن.
سوريه ایچکی ایشلر وزیرلیگی پارتلش قۉلباله پارتلاوچی ماسلمه اۉرنهتیلگنی عاقبتیده یوز بېرگنینی بیلدیرگن.
خوفسیزلیک کوچلری و تېز یاردم گروهلری یرهدارلرنی شفاخانهگه یېتکزیش همده طبي یاردم کۉرسهتیش اوچون زودلیک بیلن واقعه جاییگه یوباریلگن.
وزیرلیکنینگ قۉشیمچه قیلیشیچه، پارتلش سببلری و اونی صادر اېتگن شخصلرنی انیقلش بۉییچه تېرگاو ایشلری دوام اېتماقده. خبرلرگه کۉره، پارتلش صادر بۉلگن کافه سوريه عدلیه سرایی یقینیده، دَمشق شهر مرکزیده جایلشگن.
دَمشق بشر اسد حکومتی اغدریلیب، احمد شرع باشچیلیگیدهگی «هیأت تحریر شام» حاکمیتگه کېلگنیدن بویان هجوم و پارتلشلر سېزیلرلی درجهده کمهیگن.
شونگه قرهمهی، شهرده وقتی-وقتی بیلن قانلی پارتلشلر یوز بېرماقده.
جملهدن، ۱۹-می کونی دَمشقدهگی سوريه مدافعه وزیرلیگی بناسی تشقریسیده موترگه اۉرنهتیلگن بۉمبه پارتلشی عاقبتیده بیر کیشی جان بېریب و ینه 18 کیشی یرهلنگن.
