چین وطنداشی، «تبت» خودمختار حدودی مستقللیگینی قۉللب-قوّتلهگن فعال نیویورکده بیرلشگن ملتلر تشکیلاتی باش قرارگاهی آلدیده اۉزیگه اۉت قۉییب، جان بېردی.
رویترز خبریگه کۉره، پنجشنبه کونی (۱۱-سرطان) محلي وقت بیلن ساعت تخمیناً ۶:۳۰ ده نیویورک پولیس بۉلیمی خادملری واقعه جاییگه یېتیب کېلگنیده، اېرکک نینگ تنهسی آغیر درجهده کویگن اېدی.
نیویورک پولیسی بیاناتیده بیرلشگن ملتلر تشکیلاتی بناسی آلدیده بیر اېرکک نینگ اۉزیگه اۉت قۉیگنینی تصدیقلهگن، بیراق اونینگ شخصی و بو ایشگه اوندهگن سببلر حقیده معلومات بېرمهگن.
شو بیلن بیرگه، چیندن سورگونده یشهیاتگن «تبتلیکلر» تامانیدن یوریتیلهدیگن تبت آوازی آنلاین نشری حادثه تفصیلاتلرینی اعلان قیلدی.
نشرنینگ یازیشیچه، هلاک بۉلگن شخص «لوبگا رنگزن» اسملی اېرکک بۉلیب، او تبتنینگ چیندن مستقللیگینی طلب قیلیش مقصدیده اۉزیگه اۉت قۉیگن.
نیویورک پولیس بیاناتیده ایتیلیشیچه، او آغیر کوییش جراحتلری بیلن «بلویو» شفاخانهسیگه آلیب باریلگن و شو یېرده اونینگ وفاتی قید اېتیلگن.
معلوم قیلینیشیچه، رنگزت «اوبر» پلاتفورمسیده تکسی هیداوچیسی بۉلیب ایشلهگن. او واقعه جاییگه تبت بیراغی بیلن کېلگن و منطقه مستقللیگی طلبیگه اعتبار قرهتیش اوچون اۉزیگه اۉت قۉیگن.
اونینگ اوبردهگی همکسبلریدن بیری رنگزن چین حکومتی تامانیدن قبول قیلینگن «ملتلر بیرلیگی» قانونینی کېسکین تنقید قیلگنینی ایتگن. مذکور قانون پېکین تامانیدن مملکتدهگی 55 اېتنیک گروه اوچون «عمومي ملي اۉزلیک»نی شکللنتیریش مقصدیده قبول قیلینگن.
تنچو گیاتسو لوبگا رنگزن «تبت نینگ چرچهمس حمایهچیسی» دېب تعریفلب، اونینگ اۉلیمیدن «چوقور قیغوده» اېکنینی بیلدیرگن.
اوشبو کمپنی فعاللری نینگ معلوماتیگه کۉره، ۲۰۰۹–۲۰۲۲-ییللر آرهلیغیده تبت مستقللیگینی قۉللب-قوّتلهگن۱۵۰نفردن آرتیق فعال اۉز ناراضیلیگینی نمایش اېتیش اوچون اۉزیگه اۉت قۉیگن.
شوندن۱۰ تهسی سورگونده یشهیاتگن تبتلیکلر تامانیدن صادر اېتیلگن.
تبت چین نینگ جَنوبی-غربیده جایلشگن، قریب۳.۷میلیون اهالیگه اېگه خودمختار حدوددیر. سۉنگگی اۉن ییللیکلر دوامیده بو منطقهنینگ۱۲۰ مینگدن۱۵۰ مینگ نفرگچه اهالیسی مستقللیک طرفداری بۉلگنی یاکه چین مرکزي حکومتیگه قرشی سیاسي فعالیتی سبب سورگون قیلینگن یاکه مجبورن مملکتنی ترک اېتگن.
