فرانسه «شار د گل» ییریک کېمهسینی یقین شرققه یوبارگنیدن ایکّی آی اۉتیب، او هېچ قندهی عملیاتی وظیفهنی بجرمهگن حالده اۉز بزهسیگه قهیتماقده.
فرانسه جمهور رییسی امانوئل مکرون، جمعه کونی (۱۲ سرطان) ایکس اجتماعي ترماغیده اعلان قیلگن خبریده اوشبو ییریک کېمه تولون پورتیدهگی دایمي بزهسیگه قَیتیشینی معلوم قیلدی.
او ایران و امریکانینگ هرمز بۉغازینی قَیته آچیش بۉییچه اېریشگن کېلیشووینی «منطقوي برقرارلیک یۉلیدهگی مهم قدم» همده «ایجابي اۉزگریش» دېب بهالهدی.
مکران نینگ قۉشیمچه قیلیشیچه، «شار د گل» وطنگه قَیتهدی، اونینگ اۉرنیگه اېسه عمان سلطانی بیلن اۉتکزیلگن مذاکرهلر اساسیده فرانسه ایکّی دانه ماین تازهلاوچی کېمهنی منطقهگه یوبارهدی.
مکرون نینگ ایتیشیچه، فرانسه «عملیاتی احتیاجلرنینگ اۉزگریشی»نی انابتگه آلیب همده «هرمز بۉغازیده کېمهلر حرکتی خوفسیزلیگینی تأمینلشگه حصه قۉشیش» مقصدیده اوشبو قرارنی قبول قیلگن.
«شار د گل» ییریک کېمهسی بوندن ایکّی آی اوّل،۱۶ ثور کونی قیزیل دېنگیزگه کیریب کېلگن اېدی.
شوندن اوچ کون اۉتیب، بویوک بریتانيا مدافعه وزیرلیگی لندن هم «اچاماس دراگون» نی یقین شرققه یوباریشینی اعلان قیلگن.
اۉشه پیتده فرانسه و بویوک بریتانيا هرمز بۉغازی آرقهلی کېمهلر قتناوی خوفسیزلیگینی تأمینلش اوچون خلق ارا ائتلاف توزیشگه حرکت قیلهیاتگن اېدی.
بیراق شو وقت دوامیده اوشبو ایکّی دولت نینگ یقین شرقدهگی حربي کېمهلری بیرارته هم عملیات ماموریتینی عملگه آشیرمهدی.
