امریکا قۉشمه ایالتلری جمهور رییسی دونالد ترامپ بوگون (۱۷-سرطان، چهارشنبه) امریکا و ایران کوچلری اۉرتهسیدهگی کېنگ کۉلملی اۉت المشینوویدن سۉنگ ایران بیلن اۉت آچیشنی تۉختهتیش کېلیشووی “یکونلنگنینی” معلوم قیلدی.
فرانسه خبرگزارلیگینینگ خبریگه کۉره، ترامپ تورکيه پایتختی انقرهده بۉلیب اۉتهیاتگن ناتو ییغینی دایرهسیده ژورنالیستلرنینگ ایران بیلن صلح یکونلنگنمی، دېگن سوالیگه: “مېنیمچه، همهسی توگهدی. مېن اېندی اولر بیلن هېچ قندهی کېلیشوونی ایستهمهیمن”، دېب جواب بېردی.
ترامپ ایران رهبرلرینی “کسل” و “زۉرآور” دېب تعریفلب، شوندهی دېدی: “اولر کسل آدملر، اولرنی کسل آدملر باشقرماقده. اولر یاووز و زۉرآور. اگر اولر هسته قورالیگه اېگه بۉلگنیده، اوندن فایدهلنیشردی. مېنگه قالسه، بو مسأله یکونلنگن.”
امریکا جمهور رییسی اۉزینینگ مذاکرهچیلری استیو ویتکاف و جارد کوشنر بیلن مصلحتلشیشینی ایتدی. بیراق اونینگ تأکیدلشیچه، مذاکرهلرگه قَیتیش یاکه قَیتمسلیک قراری تهرانگه باغلیق.
ترامپ ینه شوندهی دېدی: “مېنگه قالسه، اولر بیلن شغللنیش وقتنی بېکارگه صرفلشدیر. اولر یالغان گپیرهدی.”
شونینگدېک، او ایراننی ۱۷-جون کونی واشنگتن و تهران اۉرتهسیده اېریشیلگن اۉت آچیشنی تۉختهتیش کېلیشووینی بیر نېچه بار ناتۉغری تلقین قیلگنلیکده عیبلهدی.
ترامپ نینگ سۉزلریگه کۉره: “همه هسته قورالی بۉلمسلیگی کېرهکلیگیگه راضی بۉلگن اېدی. بیز کېلیشووگه اېریشهمیز. کېین اولر چیقیب، مطبوعاتگه باشقه گپلرنی ایتهدی، حتی بو مسأله محاکمه قیلینمهگنینی دعوا قیلهدی… اولر عقلدن آزگن.”
واشنگتن تیناوون تونده ایران جَنوبیدهگی نشانلرگه ضربه بېرگنیدن سۉنگ، ایران اسلام انقلابی قۉریقچیلری (سپاه) فارس کۉرفزیدهگی امریکا حربي بزهلرینی نشانگه آلگنینی معلوم قیلگن.
ایران پارلمانی باشلیغی و مذاکرهلر هیئتی رهبری محمد باقیر قالیباف اېسه امریکانی کېلیشوونی بوزگنلیکده عیبلب، ایران آرتگه چېکینمسلیگینی بیلدیرگن.
