امریکا قۉشمه ایالتلری جمهور رییسی دونالد ترامپ کانگرسنی سوريهنی تروریزمنی قۉللب-قوّتلاوچی دولتلر رۉیخطیدن چیقریش نیتیدن خبردار قیلدی.
امریکا تشقی ایشلر وزیری مارکو روبیو ایکس اجتماعي ترماغیده ترامپ بوگون (چهارشنبه، ۱۷-سرطان) بو قرارینی کانگرسگه رسماً معلوم قیلگنینی یازدی.
مارکو روبیو بو قرارنی «تاریخي قدم» دېب اتهب، سوريه نینگ مذکور رۉیخطدن چیقریلیشی اقتصادي امکانیتلر و مملکتدهگی وضعیتنی یخشیلش اوچون ینگی یۉللرنی آچیشینی همده سوريه خلقیگه ترقیات امکانینی بېریشینی تأکیدلهدی.
سوريه تشقی ایشلر وزیری اسعد حسن الشیبانی هم ایکس ترماغیده امریکا قرارینی آلقیشلب، منّتدارلیک بیلدیردی.
اونینگ ایتیشیچه، بشر اسد حکومتی سیاستی طفیلی سوريهگه یوکلنگن اوشبو مقام بېکار قیلینیشی بیلن «سوريه تاریخیدهگی قاره صحیفه» یکونیگه یېتدی.
اقش ۲۰۱۱-ییلده سوريهنی تروریزمنی قۉللب-قوّتلاوچی دولتلر رۉیخطیگه کیریتگنیدن سۉنگ، سوريه حکومتی، یوقاری مرتبهلی عملدارلر و شرکتلرگه نسبتاً کېنگ کۉلملی چېکلاولر جاري قیلگن اېدی.
اوشبو چېکلاولر دایرهسیده۵۰۰ دن آرتیق شخص، کمپنی و تشکیلات، جملهدن وزیرلیکلر، مرکزي بانک، تجارت بانکلری، نفت کمپنیلری و دولت عملدارلری امریکا مالیه وزیرلیگی نینگ چېکلاولر رۉیخطیگه کیریتیلگن.
شونینگدېک، سوريه نینگ۱۴ ته بانکیگه نسبتاً قطعي مالیوي چېکلاولر جاري اېتیلیب، اولرنینگ خلق ارا مالیوي تیزیمگه کیریش امکانیتی دېیرلی تۉلیق تۉختهتیلگن اېدی.
واشنگتن و دَمشق اۉرتهسیدهگی مناسبتلر کېسکینلشیب، علاقهلر اوزیلگنیدن سۉنگ، امریکا ۲۰۲۰-ییلده «سزار قانونی»نی کوچگه کیریتدی. اوشبو قانونگه کۉره، سوريه حکومتی بیلن همکارلیک قیلووچی خارجي کمپنیلرگه هم ایکّیلمچی چېکلاولر قۉللنیله باشلندی.
بیراق بشر اسد حکومتی اغدریلیب، احمد شرع سوريه جمهور رییسی لوازمینی اېگهلهگنیدن کېین واشنگتن و دَمشق اۉرتهسیدهگی علاقهلر قَیته تیکلندی.
اقش ۲۰۱۷-ییلده احمد شرع نی قۉلگه آلیش اوچون۱۰ میلیون امریکا دالری مقداریده مکافات اعلان قیلگن اېدی. اما او حاکمیت تېپهسیگه کېلگنیدن سۉنگ، بو مکافات بېکار قیلیندی.
