تایلند پایتختی بانکوکدهگی بیر سالونیده یوز بېرگن ییریک یانغین عاقبتیده کمیده۲۷ کیشی جان بېرگن و اۉنلب آدملر جراحت آلدی.
آسوشیتدپرس خبرگزارلیگی خبریگه کۉره، یانغین بوگون (دوشنبه، ۲۲-سرطان) تونگی ساعت ۱۲:۰۰دن بیر نېچه دقیقه آلدین باشلنگن.
اجتماعي ترماقلرده ترقهلگن ویدېولرده بنا ایچیدن اولکن النگهلر آتیلیب چیقهیاتگنی، قویوق قاره توتون آسمانگه کۉتریلهیاتگنی و آدملر واقعه جاییدن اوزاقلشهیاتگنی عکس اېتگن.
بانکوک حاکمی چادچارت سیتیپونت نینگ ایتیشیچه، حادثهده کمیده۲۷ کیشی هلاک بۉلگن، ینه۶۳کیشی شفاخانهگه یېتکزیلگن.
اونینگ سۉزلریگه کۉره، کوییش جراحتینی آلگن۲۲نفر جبرلنووچی نینگ احوالی آغیر.
یانغین نینگ انیق کېلیب چیقیش سببی حاضرچه نامعلوم.
بوگون اېرتهلب راهبان بودایی قربانلر خاطرهسیگه دعا قیلیش اوچون واقعه جاییگه تشریف بویورگن پیتده، نرسلر یقین اطرافدهگی آدملرگه یانیب کېتگن بنادن قالگن توتون و ضررلی بوغلردن حمایهلنیش اوچون نقابلر ترقهتدی.
تایلند باش وزیری آنوتین چارنویراکول هم حادثه جاییگه باریب، ژورنالیستلر بیلن صحبتلشدی.
اونینگ ایتیشیچه، بارده چیقیش قیلهیاتگن موسیقهچی الکتر تأمیناتی اوزیلیشیدن آلدین صحنه یقینیدهگی الکتر تقسیملش قوریلمسیدن توتون چیقهیاتگنینی کۉرگن. شوندن سۉنگ پارتلش آوازی اېشیتیلگن و قویوق توتون جوده تېز بوتون بنانی قاپلهگن.
باش وزیر نینگ قۉشیمچه قیلیشیچه، یانغیننی تۉلیق نظارتگه آلیش اوچون قریب یریم ساعت وقت کېتگن. هلاک بۉلگنلر نینگ کۉپچیلیگی بار نینگ آرقه قِسمیدهگی حاجتخانه(تشناب)ده تاپیلگن.
سۉنگگی ییگیرمه ییل ایچیده تایلندده شونگه اۉخشش بیر نېچه هلاکتلی یانغینلر صادر بۉلگن. ۲۰۲۲-ییلده مملکت شرقیدهگی موسیقی باریده یوز بېرگن یانغین عاقبتیده۱۴ کیشی هلاک بۉلگن اېدی. بوندن هم دهشتلی فاجعه اېسه ۲۰۰۹-ییلده بنگکوکدهگی تونگی کلوپده ینگی ییل بیرهمی پیتیده یوز بېرگن بۉلیب، یاپیق بناده موشکبازلیک سبب کېلیب چیققن یانغینده۶۶ کیشی هلاک بۉلگن و۲۰۰ دن آرتیق کیشی جراحت آلگن.
