سوريه ایچکی ایشلر وزیرلیگی مملکت مخصوص پولیس کوچلری لباننینگ «حزبالله» گروهی اوچون مۉلجللنگن ایلغار قورال-یراغ یوکینینگ قاچاقینی تۉختهتگنینی معلوم قیلدی.
سوريهنینگ دولت اخبارات آژانسی (سانا) خبریگه کۉره، مصادره قیلینگن یوک ترکیبیده اوزاق مصافهلی راکتلر، باشقریلهدیگن تانککه قرشی راکتلر و درونلر بۉلگن. اوشبو قوراللر سوريه-عراق چېگرهسیده انیقلنیب، مصادره قیلینگن.
سوريه ایچکی ایشلر وزیرلیگی دستلبکی تېرگاو و عملیات دوامیده تۉپلنگن دلیللر اوشبو قورال-یراغ سوريه حدودی آرقهلی لبانگه آلیب اۉتیلیب، «حزبالله» جنگریلریگه یېتکزیلیشی رېجهلشتیریلگنینی کۉرسهتهیاتگنینی بیلدیردی.
وزیرلیکنینگ قۉشیمچه قیلیشیچه، واقعهنینگ برچه تفصیلاتلرینی انیقلش، علاقهدار شخصلر و ترماقلرنی فاش اېتیش بۉییچه تېرگاو ایشلری دوام اېتماقده.
سوريه ایچکی ایشلر وزیرلیگی مذکور قورال-یراغ قَیسی دولت یاکه گروه تامانیدن «حزبالله»گه یوباریلگنی حقیده معلومات بېرمهدی. بیراق ایران اوزاق ییللردن بویان «حزبالله»نی قورال-اسلحه و حربي جهازلر بیلن تأمینلشده عیبلنیب کېلهدی.
بشار اسد حاکمیتی دوریده سوريه ایراندن لباندهگی «حزبالله»گه قورال یېتکزیش نینگ اساسي ترانزیت یۉلی حسابلنگن. اما اسد حکومتی قولهگچ و احمد شرع باشچیلیگیدهگی «هیأت تحریر شام» حاکمیتگه کېلگچ، ایران نینگ سوريهدهگی تأثیری سېزیلرلی درجهده کمهیگن.
حاضرده سوريهگه رهبرلیک قیلهیاتگن احمد شرع یقینده امریکا جمهور رییسی دونالد ترامپ بیلن «حزبالله»گه قرشی کورهش مسألهسینی محاکمه قیلگن.
