ایران قۉللب-قوّتلهیاتگن یمندهگی حوثيلر سعوديه عربستانینینگ بیر نېچه نفت تانکېریگه قیزیل دېنگیزدهگی «ینبع» بندری یقینیده هجوم قیلگنینی معلوم قیلدی.
فرانسه خبرگزارلیگی خبریگه کۉره، حوثيلر مطبوعات سۉزلاوچیسی یحیی سریع بوگون (چهارشنبه، ۱۴ اسد) اعلان قیلگن ویدېوده سعوديه نینگ «وفا» ناملی نفت تانکری قیزیل دېنگیزنینگ شمالي قِسمی و«ینبع» ساحللری یقینیده بیر نېچه بالیستیک راکت بیلن موفقیتلی نشانگه آلینگنینی ایتدی.
حوثيلرنینگ تأکیدلشیچه، اولر سعوديه عربستانیگه قرشی دېنگیز قملینی اعلان قیلگنیدن سۉنگ، ریاض اۉز نفت تانکرلرینی قیزیل دېنگیزنینگ شمالي قِسمیگه یۉنهلتیرگن.
یحیی سریع نینگ ایتیشیچه، حوثيلر اېندیلیکده سعوديه نفت تانکرلریگه قرشی هجوملرنی ینهده کوچهیتیرهدی. اولرنینگ مقصدی «برچه دېنگیز یۉللرینی تۉسیش و تانکرلرنینگ حرکتلنیشیگه یۉل قۉیمسلیک» اېکنینی بیلدیردی.
حوثيلر 22-جولای کونی سعوديه عربستانیگه قرشی دېنگیز قملینی اعلان قیلگنیدن بویان بو سعوديه نینگ سکّیزینچی نفت تانکری هجومگه اوچرهگنینی معلوم قیلدی.
اثران قۉللب-قوّتلهیاتگن اوشبو قوراللی گروه سعوديه عربستانی بیلن کېسکینلیک کوچهیگنیدن سۉنگ، «کۉزگه کۉز» تمایلی اساسیده ریاض گه قرشی دېنگیز قملینی جاري اېتگنینی بیلدیرگن.
فرانسه خبرگزارلیگی معلوماتیگه کۉره، اوشبو قمل دنیادهگی اېنگ ییریک نفت اېکسپورتچیلریدن بیری بۉلگن سعوديه عربستانی نینگ نفتینی جهان بازارلریگه یېتکزیب بېریش امکانیتیگه جدّي تهدید توغدیرگن. اینیقسه، ایران بیر وقت نینگ اۉزیده هرمز بۉغازینی یاپیب، سعوديه نینگ ینه بیر مهم دېنگیز یۉلینی تۉسیب قۉیگنیدن سۉنگ وضعیت ینهده مرکّبلشگن.
هرمز بۉغازی یاپیلگچ، «ینبع» بندری سعوديه نفت اېکسپورتی نینگ اساسي مرکزیگه ایلندی. باب ال-مندهب بۉغازی اېسه خام نفت تشیش نینگ حیاتي یۉلیگه ایلندی.
مذکور تار دېنگیز یۉلی قیزیل دېنگیزنی هند اقیانوسی بیلن، سووهیش کانالی آرقهلی اېسه اۉرته یېر دېنگیزی بیلن باغلهیدی.
کپلېر دېنگیز کوزهتوو کمپنیسی معلوماتلریگه کۉره، سهوديه عربیستانی نینگ بابالمندب آرقهلی دېنگیز یۉلی بیلن خام نفت اېکسپورتی ۲۰۲۶-ییل مارچ دن جون اۉرتهلریگچه بۉلگن دورده ۲۰۲۵-ییل نینگ شو دوریگه نسبتاً سکّیز برابر آشگن.
جون آییده اېکسپورت حجمی ۱۰۰میلیون بشکه گه یقینلشگن. تققاسلش اوچون، فبروری آییده بو کۉرستکیچ قریب ۷ میلیون بشکه اېدی.
کپلر معلوماتلریگه کۉره، اپریل و می آیلریده سعوديه نینگ برچه دېنگیز آرقهلی خام نفت اېکسپورتی«ینبع» پورتی آرقهلی عملگه آشیریلگن.
اېندیلیکده حوثيلر عیناً شو پورتدن حرکتلنهیاتگن سعوديه نفت تانکرلرینی نشانگه آلیب، مملکت نینگ خام نفت اېکسپورتیگه جدّي خوف توغدیرماقده.
حاضرده حوثيلر ثنا پایتختی و یمن نینگ شمالي حدودلری، جملهدن باب المندب بۉغازیگه توتش قیزیل دېنگیز ساحللرینی نظارت قیلماقده.
