اطلاعات روز: فاریاب ولایت کې سیمه ییزې سرچینې وايي، د دغه ولایت په شیرین تګاب ولسوالۍ کې د محمد عیسی په نوم یوه شل کلن ځوان ځان وژنه کړې ده.
د سرچينې د معلوماتو له مخې، دغه پېښه تېره ورځ (جمعه، ۲۴ د چنګاښ) د شيرين تګاب ولسوالۍ په «تورتکل» کلي کې رامنځته شوې ده.
سرچینې اطلاعات روز ورځپاڼې ته وويل، دغه ځوان د ياد کلي اوسېدونکی و، چې د تفنګچې په وسیله یې په خپل سر ډز کړی او ژوند ته یې د پای ټکی ایښی دی.
د دغه ځوان د ځان وژنې لامل او انګیزه لا تر اوسه نده معلومه.
دا په داسې حال کې ده چې په دې وروستیو کې په فاریاب ولایت کې د ځان وژنې پېښې زیاتې شوي دي.
تېره اونۍ د چهارشنبې په شپه د دې ولایت په المار ولسوالۍ کې یو بل ۲۰ کلن ځوان هم ځان زندی کړی و.
بې کاري، بېوزلي او کورنی تاوتريخوالى په هېواد کې د ځان وژنې اصلي لاملونه ښودل شوي دي.