اطلاعات روز: په غور کې د مرستندويه موسېساتو د فعاليت تر ځنډېدو وروسته، په دې ولايت کې اړمن خلک له طالبانو غواړي چې د موسېساتو د فعاليت مخنيوی دې نه کوي.
دوی وايي، چې له څو مياشتو راهيسې د مرستندويه بنسټونو په ځانګړې توګه د خوړو نړيوال سازمان مرستې په غور کې ځنډيدلې دي او له همدې کبله فقر او تنګلاسي نوره هم زياته شوې.
۵۰ کلن فيض الله چې تېر کال د فقر او وچکالۍ له کبله له پسابند ولسوالۍ فيروزکوه ښار ته راغلی وايي، چې د موسېساتو د مرستو تر بنديدو وروسته له بد حالت سره مخ دی.
دی وايي، چې اوس د خوراک لپاره هيڅ نه لري او که د مرستندويه بنسټونو مرستې بيرته پېل نه شي نو وضعيت به تر دې هم خراب شي.
ده وويل: «نه کار شته او نه دنده. په کور کې هيڅ هم نه لرو. د موسېساتو مرستې يې هم راباندې بندې کړې. که د موسېسو مرستې شروع نه شي، وضعيت به مو تر دې هم خراب شي. موږ د طالبانو له سيمهييزو مسوولينو غواړو چې د موسېساتو د فعاليت مخنيوی دې نه کوي، تر څو هغوی خلکو ته مرستې ورسوي.»
د غور يو بل اوسېدونکی غلام حيدر وايي، چې د موسېسو په ځانګړې توګه د خوړو نړيوال سازمان مرستې د خلکو لپاره حياتي وې، خو څو مياشتې کېږي چې دا مرستې دريدلې دي.
دی زياتوي: «په داسې حال کې چې په نورو ولايتونو کې خلکو ته د مرستو وېش روان دی، موږ په دې تمه يو چې په غور کې به هم خلکو ته د مرستو ويش بيرته پيل شي.»
په غور کې د طالبانو ځايي مسوولين بیا وايي، چې د مرستو په وېش کې د نه شفافيت له وجې د مرستنديو بنسټونو فعاليت درېدلی دی.
په غور کې د طالبانو د والي وياند عبدالواحد حماس وايي: «د موسېسو د بندېدلو لامل دا و چې مسوولينو د دې بنسټونو د وېش په بهير کې د روڼتيا غوښتنه وکړه، متأسفانه چې د دوی موخې شفافې نه دي او نه غواړي چې مرستې واقعي مستحقينو ته ورسېږي.»
په داسې حال کې چې سرچينې وايي، چې په غور کې د خوراک نړيوال پروګرام د طالبانو له لوري د بنديزونو له وجې په دې ولايت کې خپل فعاليت درولی دی.
طالبانو په مرستندويه بنسټونو کې د ښځو پر کار بنديز لګولی او دا بنديز هم د يو شمير موسېسو د فعاليت درېدلو لامل شوی دی.
