اطلاعات روز: د افغانستان د سولې په چارو کې د امريکا پخواني ځانګړي استازي زلمي خليلزاد د هلمند د اوبو پر سر د ايران او طالبانو د شخړې په اړه ويلي، په داسې حال کې چې ايراني چارواکي ځواک ښيي او افغانستان ګواښي، خو طالبان په حيرانوونکې توګه حوصله کوي او سياستمدارانه چلند کوي.
نوموړي نن (چهارشنبه، ۳ د غویي) سهار پرلپسې ټويټونو کې ايراني رهبران تورن کړي چې د افغانستان په اړه پاروونکي اقدامات کوي.
خليلزاد زياته کړې: «طالب چارواکي د دې موضوع په تړاو په حيرانوونکې توګه حوصلهناک او سياستمدارانه چلند کوي.»
طالبان وايي، چې د ۱۳۵۱ کال تړون ته ژمن دي او په عين حال کې يې استدلال دادی چې د وچکالۍ او آبوهوا د بدلون له کبله د اوبو کچه کمه شوې ده.
خليلزاد زياته کړې چې کله دواړه اړخونه د هلمند تړون ته ژمن وي، نو بايد د اختلافي وضعيت په تړاو په خپله په تړون کې له وړانديز شويو حللارو استفاده وکړي.
ده زياته کړې چې په دې تړون کې ويل شوي چې کېدلای شي په ځينو کلونو کې د وچکالۍ له کبله د اوبو کچه کمه شي، د اختلاف په وخت کې به دواړه هيوادونه د حللارې موندلو لپاره دوه اړخيز ډيپلوماټيک تعامل کوي، يا به هم له درېيمګړي استفاده کوي او په وروستۍ مرحله کې به يې په قضايي توګه حل کوي.
خليلزاد ويلي، چې تر اوسه له دې حللارو استفاده نه ده شوې او ايران بايد د ځواک له ښودنې ډډه وکړي.
ايراني چارواکو په دې وروستيو کې د حقابې د نه تأمين په صورت کې طالبان ګواښلي و خو طالبان زياتوي چې د وچکالۍ له کبله کافي اوبه نشته.
ايرنا خبري اژانس په تازه توګه د افغانستان په بندونو کې د سټلايټ انځورونه خپاره کړي او ليکلي يې دي چې دا انځورونه په کجکي او کمال خان بندونو کې د اوبو پام وړ کچه ښيي او د طالبانو وروستۍ ادعا ردوي.
ايراني چارواکي ټينګار کوي چې د طالبانو ادعا بايد د يوه ګډ تخنيکي پلاوي له خوا وارزول شي.
