اطلاعات روز: له هرات ښار څخه د اسلام کلا سرحد پر لور د طالبانو د نظامي کاروان د ويډيو له خپرېدو سره هم مهاله د ايران د کورنيو چارو وزير احمد وحیدي ويلي، چې طالبان بايد خپلو پوځونه متوجې کړي چې بيا جګړه پېښه نشي.
د تسنيم خبري اژانس په وينا، ښاغلي وحيدي نن (چهارشنبه، ۱۰ د غبرګولي) د ايراني او طالب ځواکونو وروستۍ نښتې ته په اشارې سره ويلي، چې مسئله حل شوې «اوس د ايران او افغانستان د پولې تر منځ وضعيت ارام او شکونه د له منځه تلو په حال کې دي.»
د اسلام کلا د ګمرک مسوولينو هم د دې ګمرک د فعاليت درېدو په اړه راپورونه رد کړي دي.
له نن سهار راهيسې د طالبانو د يوه نظامي کاروان ويډيوګانې پر ټولنيزو رسنيو خپرېږي او ويل کېږي چې دا کاروان له هرات ښار څخه له ايران سره د لانجمن اسلام کلا سرحد پر لور روان دی.
خو تر اوسه هيڅ خپلواکې سرچينې له هرات څخه د اسلام کلا پر لور د طالبانو د نظامي کاروان خوځېدل نه دي تاييد کړي. طالب چارواکو او وياندويانو هم په دې اړه څه نه دي ويلي.
د ايراني پوله ساتو او طالب ځواکونو تر منځ وروستۍ نښته د شنبې (۶ د غبرګولي) په ورځ وشوه چې يو ايرانی پوله ساتی او يو طالب پکې ووژل شول.
د ايران د کورنيو چارو وزير نن د خپلو خبرو پر مهال دې نښتې ته په اشارې سره ويلي: «متأسفانه څو ځله داسې پېښې شوي، د طالبانو مسوولينو او افغانستان ته توصيه کوو چې دقت وکړي او خپل پوله ساتي متوجې کړي چې داسې پېښې ونشي.»
ده زياته کړې، چې د طالبانو يو لړ ټيټ پوړي چارواکي چې د ايران پر خلاف يې «بې ځايه او غير منطقي څرګندونې» کولې له دندو شړل شوي دي.
همدا راز احمد وحيدي ويلي، چې «اوس د افغانستان له واکمنو سره د تعامل په حال کې يو او که هره خبره چې وي بايد د خبرو له لارې حل شي».
تر دې نښتې وروسته د طالبانو دفاع او کورنيو چارو وزارتونو هم منلې وه چې دا ډله له ګاونډيانو سره جګړه کول نه غواړي او د هرې ستونزې د حل لپاره مذاکره «يوه معقوله حل لاره» ګڼي.
په دې وروستيو اونيو کې د طالبانو او ايران اړيکې د سرحدي نښتو او د هلمند په سيند کې د حقابې له وجې ترينګلې دي.