Photo: Ebrahim Noroozi/AP

د بشر حقونو څار: د نجونو او ښځو پر خلاف د طالبانو اقدامات بشري جنايت دی

اطلاعات روز: د بشر حقونو د څار په سازمان کې د افغانستان د چارو شنونکې فرشتې عباسي د ملګرو ملتونو د بشري حقونو د شورا په څلور پنځوسمه غونډه کې ويلي، چې د ښځو او نجونو په تړاو د طالبانو ځينې اقدامات د جنسيتي ځور او اذيت له کبله بشري جنايت دی.

نوموړې په خپله اعلاميه کې ويلي، چې طالبانو له تېرو دوو کلونو راهيسې په پراخه او سيسټماټيکه توګه د ښځو او نجونو حقونه تروړلي او هغوی يې له عمومي ژوند څخه حذف کړې دي.

عباسي زياته کړې، چې طالبان د ښځو د حقونو فعالان په خپلسرې توګه نيسي او شکنجه کوي يې.

د دې په خبره: «د بشر حقونو څار په دې باور دی چې ځينې ناوړه ګټه اخيستنې د جنسيتي ځور او اذيت له وجې د بشريت پر خلاف جنايت دی.»

فرشتې عباسي همدا راز ويلي، چې طالبانو رسنۍ له منځه وړي او ورځپاڼه ليکونکي او نور نیوکه کوونکي يې په خپلسرې توګه نيولي او شکنجه کړي دي. د دې په وينا، طالبانو ځينې همجنس پالي، د دولت کارمندان او پخواني امنيتي غړي په غير قانوني توګه اعدام کړي دي.

دې زياته کړې چې افغانستان په نړۍ کې په بدترين بشري کړکېچ بدل شوی او دوه پر درېيمه برخه وګړي يې بېړنيو مرستو ته اړتيا لري. د عباسي په وينا، طالبان د وضعيت د بدتر کېدلو مسوول دي.

د بشر حقونو د څار په سازمان کې د افغانستان د چارو شنونکې ټينګار کړی چې د بشري حقونو شورا بايد «د شديدو بين المللي جناياتو د اوږود مهالي مصونيت د پای ته رسولو لپاره زيات اقدامات وکړي.»

دې د بشري حقونو د ځانګړي راپورچي کار مهم بللی او د هغه د ماموريت د غزېدو غوښتنه يې کړې ده.

همدا راز عباسي ټينګار کړی چې د بشري حقونو شورا بايد د بين المللي جناياتو په تړاو د ځواب غوښتنې لپاره يو ځانګړی، خپلواک او بې پرې ميکانيزم جوړ کړي.

دې ويلي: «د ښځو او نجونو د حقونو د دفاع لپاره بايد زيات کار وشي. د ۲۰۲۳ جون پر مهال د ځانګړي راپورچي او د ښځو او نجونو پر خلاف د تبعيض په اړه د کاري ډلې مشترک راپور يو مهم ګام و، خو دا شورا بايد خپلې سپارښتنې په بشپړه توګه اجرا کړي.»

د دې په وينا، په افغانستان کې د بشري حقونو کړکېچ ويجاړوونکی او پر سختېدو دی او بېړنيو اقداماتو ته اړتيا لري.

د ملګرو ملتونو د بشري حقونو د شورا د څلور پنځوسمې غونډې پرون لومړۍ ورځ وه چې محوري موضوع يې افغانستان وه.

په دې غونډه کې د ملګرو ملتونو د بشري حقونو ځانګړي راپورچي ريچارډ بېنټ هم خبرې وکړې.