اطلاعات روز: د ماليزيا لومړي او د ماليې وزير انور ابراهيم د ملګرو ملتونو په عمومي غونډه کې ويلي، چې په افغانستان کې د نجونو د زده کړو له حق څخه انکار د اسلامي لارښوونو نقض دی.
د ماليزيا لومړي وزير چې پرون (جمعه، ۳۱ د وږي) يې د ملګرو ملتونو په اته اويايمه عمومي غونډه کې خبرې کړي، له طالبانو يې غوښتي چې د ښځو او نجونو پر خلاف تبعيضي سياستونه دې لغو کړي.
ښاغلي ابراهيم په خپلو خبرو کې په افغانستان کې بشري کړکېچ ته هم اشاره کړې او ويلي يې دي چې ماليزيا «په افغانستان کې د بشري وضعيت د خرابیدو په اړه ژوره اندېښمنه ده.»
نوموړي زياته کړې چې په افغانستان کې بشري کړکېچ په ځانګړې توګه د وروستيو درې کلنو پرلپسې وچکاليو او ملخانو د هجوم له کبله چې د غنمو په راټولولو کې د بزګرانو پر وړاندې خنډ دي، زور اخیستی دی.
د ماليزيا لومړي وزير ويلي، چې هيواد يې له افغانستان سره د ولس او ولس تر منځ اړيکو ته ژمن دی او دې اړيکې ته به د بشرپالو مرستو له لارې ادامه ورکوي.
طالبانو پر افغانستان تر بيا واکمنېدو وروسته تر شپږم ټولګي پورته نجونې ښوونځي ته له تللو منع کړې دي او د دوی پر وړاندې يې د پوهنتونو دروازې هم تړلې دي.
تر دې وړاندې د اسلامي همکاريو د سازمان يوه پلاوي کابل ته د سفر پر مهال طالبانو ته ويلي و، چې د اسلامي علماوو د اجماع له مخې تحصيل او زده کړه پر نر او ښځې فرض ده.
د طالبانو رهبران له پرلپسې ژمنو سره-سره نه يوازې تر دوو کلونو په زيات وخت کې د نجونو ښوونځي نه دې پرانيستي، بلکې زده کړو او کار ته د ښځو د لاسرسي او په ټولنه کې د هغوی د مشارکت په تړاو يې نور بنديزونه هم لګولي دي.