اطلاعات روز: د ملګرو ملتونو عمومي منشي انټونيو ګوتريش پر اسراييلو د ايران انتقامي بريدونو ته په غبرګون کې په سيمه کې د لا زيات تاوتريخوالي په اړه انديښنه ښودلې او ويلي يې دي چې سيمه او نړۍ د يوې بلې جګړې توان نه لري.
ګوتريش په يوه اعلاميه کې ويلي: «زه نن مازديګر پر اسراييلو د ايران د اسلامي جمهوريت د پراخ بريد له امله را پيدا شوې ترينګلتيا غندم. زه د دې دښمنيو د سمدستي درولو غوښتنه کوم.»
ده ويلي، چې له ټولو اړخونو غواړي چې له حد اکثر زغم څخه کار واخلي تر څو له هر داسې اقدام څخه ډډه وشي چې په منځني ختيځ کې په څو جبهو کې د پراخې نظامي ښکېلتيا لامل کېدلای شي.
ګوتريش ويلي: «ما بيا – بيا ټينګار کړی دی چې نه هم سيمه او نه هم نړۍ د يوې بلې جګړې توان لري.»
تېره شپه د ايران دولتي ټلويزیون په اسراييلو کې پر يو شمېر اهدافو د «بې پيلوټه الوتکو په وسيله» د سپاه پاسداران د بريد خبر ورکړ.
سپاه پاسداران په يوه اعلاميه کې ويلي: «د صهيونيستي رژيم جناياتو ته په ځواب کې د سپاه هوايي ځواکي په اشغال شوې ځمکه کې يو لړ اهداف د توغنديو او بې پيلوټه الوتکو په مټ په نښه کړل.»
اسراييل ادعا کوي چې د ايران ټولې بې پيلوټه الوتکې او توغندي يې شنډ کړي. د اسراييلو لومړي وزير بنيامين نتنياهو پر ايکس ليکلي: «موږ يې مخه ونيوله او مهار مو کړل. موږ به بريالي کېږو.»
د امريکا، برېتانيا، جرمني او کاناډا مشرانو د ايران بريدونه غندلي دي.
چين او سعودي عربستان له دواړو اړخونو غوښتي چې زغم وکړي او له نښتو پر شا شي.
