اطلاعات روز: پاکستانۍ رسنيو د پاکستاني نظاميانو او د افغانستان د طالبانو ترمنځ د «اوربند» د پرېکړې په اړه خبر ورکړی دی.
طالبان او پاکستاني پوله ساتي له څو ورځو راهيسې د پکتيا ولايت پر پوله له يوه-بل سره په نښتو اخته دي.
د پاکستان ډان نيوز رسنۍ نن (يکشنبه، ۳۰ د غويي) ليکلي، چې د خيبرپښتونخوا پر پوله تر څلور ورځنۍ نښتې وروسته د قبايلو له مشرانو او د افغانستان او پاکستان له چارواکو جوړې جرګې د اوربند پرېکړه کړې ده.
د دې رسنۍ په وينا، د پاکستاني ځواکونو او طالبانو ترمنځ نښته د جمعې په ورځ سخته شوه او له کبله يې په کرم کې خرلاڅې دروازې ته نږدې په کليو او ښارګوټو کې مېشت خلک بې ځايه شول.
ډان نيوز ليکلي، چې په دې سيمه کې اوربند شوی او تمه کېږي چې پوله به هم ژر پرانيستل شي.
قومي مشر جلال بنګښ ډان نيوز ته ويلي، چې په خرلاڅې سرحدي پوله کې دا جرګه جوړه شوې چې محلي مشران، روحانيون او د دواړو اړخونو چارواکي په کې وو.
ده زياته کړې: «په دې غونډه کې پرېکړه وشوه چې په سيمه کې د امنيت ساتنې په موخه د سولې مشترکه کمېټه جوړه شي.»
د ده په وينا، جرګې همدا راز پرېکړه کړې چې اختلافي مسايل باید په دوستانه توګه حل کړي.
د طالبانو او پاکستان چارواکو تر اوسه په دې اړه څه نه دي ويلي.
تېره اونۍ ځينو سرچينو اطلاعات روز ورځپاڼې ته وويل، چې له پاکستاني لوري سره د طالبانو د نښتې لامل پر پوله د پاکستان له لوري د يوې امنيتي پوستې جوړول و.
سرچينو وويل، چې طالبانو د دې پوستې د چارو د مخنيوي په موخه پر پاکستاني لوري ډزې وکړې چې هغوی هم غبرګون وښود.
له پاکستاني نظاميانو سره د طالبانو د څو ورځنۍ شخړې له امله مرګ ژوبله هم اوښتې ده.
ځايي سرچينو د جمعې په ورځ وويل، چې په ډنډپټان ولسوالۍ کې د پاکستاني لوري د درنو وسلو په ډزو کې څلور زده کوونکي وژل شوي دي.
د دې نښتې له امله د سيمې اوسېدونکي هم بې ځايه شوي.