اطلاعات روز: د امریکا او اسراییلو د دفاع وزیرانو په خپلو ټیلیفوني خبرو کې په عراق کې د امریکايي ځواکونو پر اډې برید د شخړې «خطرناک زیاتېدل» ګڼلي او له ایران سره تړلې وسله والې ډلې مسوولې بللې دي.
له راپورونو سره سم، په دې برید کې پنځه امریکايي ځواکونه ژوبل شوي دي.
د رویټرز له راپور سره سم، د عراق دوو امنیتي سرچینو ويلي، چې د عراق په لوېديځ کې پر عین هوايي اډې دوه کاتیوشا توغندي ويشتل شوي دي. د عراق يوې امنیتي سرچینې زیاته کړې چې توغندي په اډه کې دننه لګېدلي دي.
د دې برید مسوولیت تر اوسه کومې ډلې نه دی منلی.
د امریکا دفاع وزیر لویید اسټین د اسراییلو له دفاع وزیر یواو کالانت سره د خپلو ټیليفوني خبرو په اړه پر ایکس ټولنیزې شبکې ليکلي: «موږ موافقه وکړه چې د عراق په لوېديځ کې په عین الاسد اډې کې پر مېشتو امریکايي ځواکونو د ایران پلوو وسله والو ډلو برید [د شخړې] خطرناک زیاتېدل ښيي.»
ده زیاته کړې، چې په دې ترینګلي وضعیت کې يې د متحده ایالاتو د ځواکونو د حالت د پياوړي کولو لپاره له یواو ګالانت سره پر ځینو اقداماتو خبرې کړې دي.
ده ويلي: «ما د اسراییلو له دفاع وزیر یواو ګالانت سره خبرې وکړې تر څو د ایران، د لبنان د حزب الله او نورو وسله والو ډلو پر وړاندې له اسراییلو څخه د دفاع لپاره د امریکا متحده ایالاتو پر تعهد ټینګار وکړم.»
په تهران کې د حماس د سياسي دفتر د مشر اسماعیل هنیه او بیروت کې د لبنان د حزب الله ډلې د لوړپوړي قومندان فواد شکر وژل کېدو انديښنې را پيدا کړي چې په غزې کې روانه جګړه ښايي ټول منځني ختيځ ته وغزیږي.
