د امریکا د بهرنیو چارو وزیر مارکو روبیو وایي، د امریکا حکومت تل د اختلافونو د حل لپاره ډیپلوماسۍ ته ژمن دی او دا دریځ د ایران په اړه هم صدق کوي.
روبیو دا څرګندونې نن (چهارشنبه،۳۱د چنګاښ) په فیلیپین کې د سویل ختیځې اسیا د هېوادونو ټولنې (آسهآن) د غړو د غونډې په څنډه کې کړي او ویلي، ایران د ډیپلوماټیکو خبرو اترو پر مهال پر خپلو ژمنو عمل نه کوي.
د امریکا د بهرنیو چارو وزیر وویل: «یوازې غواړم یو ځل بیا ټینګار وکړم چې متحده ایالات تل ډیپلوماسۍ ته ژمن دي. موږ پراخ نظره یو او تل د خبرو اترو له لارې د اختلافونو حل ته لېوالتیا لرو. دا موضوع د ایران په اړه هم صدق کوي.»
هغه ایران د ډیپلوماټیکو ژمنو په ماتولو تورن کړ او ویې ویل: «سره له دې چې ایران په مستقیم او غیرمستقیم ډول له امریکا سره د اختلافونو د حل لپاره اړیکې نیولې دي او آن ځینو هوکړو ته هم رسېدلي وو، خو له بده مرغه تر اوسه یې خپلو ژمنو ته عمل نه دی کړی.»
مارکو روبیو وویل، د امریکا او ایران ترمنځ اوسنۍ ستونزه دا ده چې د ایران اسلامي جمهوریت د خبرو اترو په اړه «جدي» نه دی.
هغه زیاته کړه: «که ایران جدي وي، موږ هم جدي یو. که هغوی جدي نه وي، موږ به د خپلو او د خپلو متحدانو د ګټو د ساتنې لپاره هر اړین اقدام ترسره کړو.»
د امریکا د بهرنیو چارو وزیر د نن سهار د شخړو د نوي پړاو په اړه، چې د یوولسمې پرله پسې شپې لپاره یې دوام درلود، وویل چې اصلي موضوع د هرمز تنګي ده.
هغه وویل: «په اصل کې موضوع ډېره ساده ده. ایران داسې حق غواړي چې د هېڅ موجود حقوقي چوکاټ له مخې یې نه لري، یعنې د هرمز تنګي له لارې د تګ راتګ کنټرول. هرمز یوه نړیواله سمندري لار ده.»
خو بلخوا ایراني چارواکي بیا متحده ایالات د خپلو ژمنو په ماتولو تورنوي. د دواړو هېوادونو وروستۍ هوکړه، چې د پاکستان او قطر په منځګړیتوب د ۱۴ مادو د تفاهم لیک په لاسلیک سره ترسره شوې وه، هم نقض شوې ده. د ایران د بهرنیو چارو وزارت په تازه څرګندونو کې ویلي چې نور ځان د اسلاماباد تفاهم لیک ته ژمن نه ګڼي.
