د رویټرز خبري اژانس راپور ورکړی چې پاکستان د خپلې ملي کرنسۍ د ارزښت د ثبات لپاره له امریکا څخه د پنځو کلونو لپاره د ۱۰ میلیارده ډالرو په ارزښت د «د اسعارو د تبادلې د نرخ د ثبات د ملاتړ دوهاړخیزې اسانتیا» غوښتنه کړې ده.
رویټرز نن (چهارشنبه، ٣١ د چنګاښ) د یوې باخبره سرچینې له قوله لیکلي چې دا غوښتنه د امریکا د خزانې وزیر سکاټ بېسنټ ته سپارل شوې ده.
د راپور له مخې، دا غوښتنه چې د لومړي ځل لپاره افشا کېږي، وروسته له هغې مطرح شوې چې پاکستان د ایران او امریکا ترمنځ د منځګړیتوب رول ولوباوه؛ هغه اقدام چې د اسلاماباد ډیپلوماتیک دریځ یې پیاوړی کړ او د واشنګټن او نورو هېوادونو څخه یې د اقتصادي ګټو د ترلاسه کولو هیلې زیاتې کړې.
که امریکا له دې غوښتنې سره موافقه وکړي، دغه مالي ملاتړ به د پاکستان د بهرنیو اسعارو زېرمې پیاوړې کړي، پر روپۍ به فشار کم کړي او د څو اړخیزو مالي بنسټونو پر تمویل به یې تکیه راکمه کړي.
دا په داسې حال کې ده چې پاکستان د پیسو نړیوال صندوق (IMF) د پروګرام له مخې د سختو مالي او پولي پالیسیو پلي کولو ته ژمن دی.
رویټرز لیکلي چې د امریکا د خزانې وزارت د دې غوښتنې په اړه له تبصرې کولو ډډه کړې او د پاکستان د مالیې وزارت هم په رسمي ډول په دې اړه څه نه دي ویلي.
د پاکستان د مالیې وزیر محمد اورنګزیب پرون په واشنګټن کې د امریکا د خزانې له وزیر سکاټ بېسنټ سره ولیدل.
د پاکستان د مالیې وزارت د خبرپاڼې له مخې، دواړو لوریو د جیوپولیټیکي بدلونونو پر وړاندې د پاکستان د اقتصاد د زیانمننې په اړه خبرې وکړې، خو په خبرپاڼه کې د ۱۰ میلیارده ډالرو غوښتنې یادونه نه ده شوې.
د پاکستان د مالیې وزارت په خبرپاڼه کې راغلي: «سناتور اورنګزیب له امریکا وغوښتل چې د نړیوالو پانګهوالو بازارونو ته د پاکستان د لاسرسي په برخه کې لا ډېر ملاتړ وکړي؛ هغه بهیر چې د نړیوالو مالي بازارونو ته پر ښه لاسرسي، د بهرنیو اسعارو د زېرمو پر زیاتوالي او د هېواد د اعتباري درجې پر ښه والي ولاړ دی.»
دغه وزارت زیاته کړې چې دواړو لوریو د اقتصادي همکاریو پر پراخولو، په پاکستان کې د امریکا د پانګونې پر زیاتولو او د ستراتیژیکو پروژو پر مخ وړلو ټینګار کړی دی.
پاکستان دا مهال هم د پیسو نړیوال صندوق د ۷ میلیارده ډالرو د پور پروګرام تر ملاتړ لاندې دی؛ هغه پروګرام چې د مالیاتو زیاتوالی، د دولتي لګښتونو محدودول او اقتصادي اصلاحات پکې شامل دي.
د امریکا د اسعارو د تبادلې د نرخ د ثبات اسانتیاوې نادر مالي ابزارونه دي چې معمولاً د امریکا د اسعارو د ثبات صندوق له لارې برابریږي او د ډالرو د برابرولو، د اسعارو د تبادلې د «سوآپ» تړونونو یا مالي تضمینونو په بڼه د هېوادونو د بهرنیو اسعارو د زېرمو او د ملي کرنسۍ د ثبات لپاره کارول کېږي.
د پیسو نړیوال صندوق تر ملاتړ لاندې اصلاحاتو د پاکستان اقتصاد تر یوه بریده باثباته کړی، خو سیاسي لګښتونه یې هم درلودلي؛ لکه د مالیاتو لوړوالی، د دولتي لګښتونو محدودیت او د پراختیايي او ټولنیزو هوساینې پروګرامونو لپاره د دولت د لګښت کولو وړتیا کمېدل.
سره له دې، په پاکستان کې جوړښتي ستونزې لا هم پر خپل ځای پاتې دي او بهرنۍ پانګونه هم محدوده ده.
د پاکستان حکومت هڅه کړې چې له ډونالډ ټرمپ سره خپلې اړیکې د دغو ستونزو د یوې برخې د حل لپاره وکاروي او دا مهال د دواړو هېوادونو اقتصادي همکارۍ د کریپټو اسعارو، املاکو او کانونو په برخو کې هم روانې دي.
