د امریکا د خزانې وزیر سکاټ بسنت وایي، له ایران سره د هرمز تنګي د بېرته پرانیستلو او د بېړیو د ازاد تګ راتګ په اړه هوکړه ښايي نن (سېشنبه، ۱۳ د زمري) یا سبا ترلاسه شي.
د امریکا د سياېنبيسي شبکې سره په مرکه کې د امریکا د خزانې وزیر ویلي دي: «موږ له ایران سره په خبرو بوخت یو. امکان شته چې نن یا سبا یوې داسې هوکړې ته ورسېږو چې له مخې یې تنګی بېرته پرانیستل شي او دا شخړه د عادي حالت پر لور ولاړه شي.»
کله چې ترې وپوښتل شول چې ایا ایران به د دې هوکړې له مخې له بېړیو څخه د هرمز له تنګي د تېرېدو په بدل کې فیس واخلي، هغه وویل: «هغه څه چې زموږ هدف دی، د تګ راتګ ازادي ده.»
د امریکا د خزانې وزیر ویلي چې تمه لري د هغو سلګونو بېړیو د وتلو د امکان له برابرېدو سره چې په فارس خلیج کې درېدلې دي، د تېلو بیې به راکمې شي.
هغه زیاته کړې: «موضوع یوازې انرژي نه ده؛ کیمیاوي سرې، تصفیه شوي توکي او بېلابېل صنعتي ګازونه هم پکې شامل دي. د دغو توکو د بیو په کمېدو سره ښايي په بازارونو کې د ودې یوه پراخه څپه رامنځته شي.»
ایراني چارواکو تر اوسه د امریکا د خزانې وزیر څرګندونو ته کوم غبرګون نه دی ښودلی.
د امریکا ولسمشر ډونالډ ټرمپ د روانې اوونۍ په پیل کې اعلان کړی و، چې د ایران او د سیمې هېوادونو په غوښتنه او د یوې چټکې هوکړې د ترلاسه کېدو په شرط، یې پر ایران د پراخو پلان شویو بریدونو مخه نیولې ده.
هغه وروسته وویل چې له ایران سره خبرې به د دوشنبې په ورځ پیل شي، خو د ایران د بهرنیو چارو وزارت ویاند اسماعیل بقايي ویلي چې له امریکا سره هېڅ ډول خبرې نه روانې دي.
د هرمز تنګي بېرته پرانیستل د دواړو لورو ترمنځ د خبرو له لومړنیو موضوعاتو څخه بلل کېږي. دغه نړیواله اوبهلاره د بیا پیل شوو نښتو وروسته یو ځل بیا د ایران له خوا تړل شوې او له امله یې په نړۍ کې د تېلو بیې لوړې شوې دي.
