د ایران د ملي امنیت عالي شورا منشي محمدباقر ذوالقدر اعلان کړی چې تر هغه به د هرمز تنګي د امریکا له لوري د ایران د شپږو شرطونو له منلو مخکې بېرته پرانیستل نه شي.
د ایران ملي امنیت شورا د شنبې شپې (۱۷ اسد) د ذوالقدر له لوري ټاکل شوي شرطونه په «ایکس» کې خپاره کړي دي.
د بندیزونو لېرې کول، د سمندري محاصرې پای ته رسول، د جګړې د تاوان ورکول، د ایران د کنګل شویو شتمنیو ازادول، په ټولو جبهاتو کې د جګړې پای ته رسول، چې لبنان، فلسطین، یمن او عراق هم پکې شامل دي، او پر ایران د ګواښونو پای ته رسول؛ هغه غوښتنې دي چې ذوالقدر یې د هرمز تنګي د بیا پرانیستلو لپاره د شرطونو په توګه اعلان کړې دي.
تر دې مخکې دغه موارد د «اسلاماباد تفاهملیک» په نوم د ۱۴ مادېز تړون د چوکاټ یوه برخه وو. ایران دغه موارد د جګړې د دایمي پای ته رسولو او د هرمز تنګي د بشپړ پرانیستلو لپاره د وروستي تړون د ترلاسه کولو په موخه په سند کې شامل کړي وو او امریکا هم د ځینو مواردو له منلو سره موافقه کړې وه.
اوس د دغو مواردو د هرمز تنګي د بیا پرانیستلو لپاره د مخکنیو شرطونو په توګه ټاکل کېدل، ښايي پر هغه نوي تړون د هوکړې پر بهیر اغېز وکړي چې د امریکا ولسمشر ډونالډ ټرمپ یې یادونه کوي.
ټرمپ، سره له دې چې د ایران مشران یې پر «دوهمخۍ» تورنوي، تېره اوونۍ اعلان وکړ چې د هرمز تنګي د بشپړ پرانیستلو او د ایران د اټومي وړتیا د له منځه وړلو لپاره له ایراني چارواکو سره خبرې لا هم روانې دي.
له بلې خوا، ایران او عمان هم په دې وروستیو کې یوې هوکړې ته رسېدلي چې له مخې به یې د هرمز تنګی د یوه ټاکلي وخت لپاره په ګډه مدیریتوي او د سوداګریزو بېړیو څخه به د خدمتونو په بدل کې فیس اخلي.
