د قطر د بهرنیو چارو وزارت ویاند ماجد انصاري د ایران هغه ادعا په کلکه رد کړه چې ګواکې درې ایراني پیلوټان د قطر له خوا نیول شوي دي. هغه وویل، له داسې «ګمراه کوونکو څرګندونو» ډېر حیران شوی دی.
انصاري د شنبې په شپه (۲۴ د زمري) پر اېکس د یوې خبرتیا په خپرولو سره ویلي: «موږ د ایراني پیلوټانو د نیول کېدو په اړه مطرح شوې ادعاوې په کلکه ردوو.»
د ایران د وسلهوالو ځواکونو د لوی درستیز د ورکو شویو کسانو د لټون کمېټې قوماندان سید محمد باقرزاده تېره ورځ ادعا کړې وه چې درې ایراني پیلوټان د قطر په بند کې دي.
هغه له نړیوال سره صلیب څخه غوښتي وو چې د دغو پیلوټانو د برخلیک د روښانه کېدو لپاره همکاري وکړي.
د ایران د سپاه پاسداران دغه قوماندان په هغه لیک کې چې د نړیوال سره صلیب کمېټې ته یې استولی او ایراني رسنیو یې محتوا خپره کړې، ویلي چې د ایران دوه سوخو-۲۴ جنګي الوتکې د روان میلادي کال د مارچ په دویمه د یوې «جنګي دندې» د ترسره کولو لپاره په قطر کې د یوې پوځي اډې پر لور ولېږل شوې.
د نوموړي په وینا، دغې الوتکې د بېرته ستنېدو پر مهال د هوايي دفاع له خوا په نښه شوې او پیلوټانو یې له الوتکو څخه ځانونه ایستلي دي.
هغه زیاته کړې چې له څلورو پیلوټانو څخه یو، مجید کاظمي، تېره میاشت په شیراز کې خاورو ته سپارل شوی او درې نور پیلوټان «د قطري ځواکونو له خوا ژوندي نیول شوي دي».
خو د قطر د بهرنیو چارو وزارت ویاند د خپل هېواد له هوايي حریم څخه د سرغړونې وروسته پر ایراني جنګي الوتکو د دفاعي برید ترسره کېدل تایید کړي، خو ویلي یې دي چې د پیلوټانو له برخلیک څخه خبر نه دي.
انصاري ویلي: «زموږ د قلمرو د دفاع لپاره د نړیوالو قوانینو له مخې لازم اقدامات ترسره شول. په دې برخه کې باید ووایو چې د قطر د لټون او ژغورنې ټیمونو د پیلوټانو د پاتې شونو د موندلو لپاره خپلې دندې په بشپړه توګه ترسره کړې. د قطر حکومت له ایراني لوري سره اړیکه ونیوله، څو د هغه پیلوټ د پاتې شونو د سپارلو په اړه، چې موندل شوي وو، د نړیوال بشري حقونو د قوانینو له اړوندو احکامو سره سم همغږي وکړي.»
په تېرو میاشتو کې ایراني رسنیو د جګړې په لومړیو ورځو کې د دغه هېواد د هوايي ځواکونو د عملیاتو په اړه راپورونه خپاره کړي دي. همداراز، ځینو ایراني پوځي چارواکو او کارپوهانو ادعا کړې چې د ایران پخوانیو جنګي الوتکو، لکه اف-۵، پر کویټ هم بریدونه کړي او پیلوټان یې په خوندي توګه بېرته ستانه شوي دي.
