پزشکیان پرون (شنبه، ۳۱ د زمري) د «ډاکټرانو د ورځې» د نمانځنې په مراسمو کې وویل چې د ایران پخواني مشر، علي خامنهيي، هم تر وژل کېدو مخکې له دغه حالت څخه پر وتلو ټینګار کړی و.
هغه زیاته کړه چې خامنهيي په خپلو لیدنو او ویناوو کې په ښکاره ویلي وو: «باید له دې نه جګړې، نه سولې له حالت څخه ووځو.»
پزشکیان وویل، د دې هدف د ترلاسه کولو لپاره باید د «تدبیر، مصلحت، حکمت او عزت» پر بنسټ پرېکړه وشي.
هغه وویل: «داسې نه ده چې د دښمن پر وړاندې په ذلت سره شاته شو او سر ټیټ کړو. موږ کولای شو په ځواک، خو له منطق سره، کښېنو او خپلې ستونزې حل کړو.»
د ایران ولسمشر داسې مهال له «نه جګړې، نه سولې» له حالت څخه پر وتلو ټینګار کوي چې دغه هېواد له امریکا سره سږ کال څو ځله شخړه او اوربند تجربه کړی، خو لا هم وضعیت نازک پاتې دی.
په دې وروستیو ورځو کې، چې پوځي نښتې نه شته، امریکا د سمندري محاصرې د دوام ترڅنګ پر ایران د اقتصادي عملیاتو د پیل اعلان کړی دی.
په مقابل کې، ایران ادعا کوي چې د هرمز تنګی یې تړلی ساتلی او د دې لپاره چمتووالی نیسي چې ګاونډي هېوادونه د امریکا له اعلان شویو اقتصادي عملیاتو سره یوځای کېدو ته پرېنږدي.
د ایران د ملي امنیت د عالي شورا منشي محسن رضایي پرون خبرداری ورکړ چې که ګاونډي هېوادونه د امریکا له اعلان شوو اقتصادي عملیاتو سره یوځای شي، د هغوی تېل او ګاز به د هرمز له تنګي تېرېدو ته پرېنښودل شي.
هغه وویل، که کوم هېواد د «ایران پر وړاندې په اقتصادي جګړه» کې ګډون وکړي، ایران به اجازه ورنه کړي چې «حتی یو څاڅکی تېل» د هرمز له تنګي او خلیج فارس څخه بهر شي.
