د خیبر پښتونخوا والي، فیصل کریم کنډي، د تېرې شپې د طالبانو او پاکستاني سرحدي ځواکونو ترمنځ د انګور اډې د نښتې په غبرګون کې ویلي، د افغانستان طالبان باید په هېڅ ډول وهم او خیال کې نه وي.
د خیبر پښتونخوا والي نن (چهارشنبه، د عقرب ۶مه) په ایکس کې په خپاره کړي پیغام کې ویلي، پاکستان د خپلو خلکو پر وړاندې بریدونه او د خپل حاکمیت نقض نه زغمي.
هغه د افغانستان په سوېل ختیځ کې د پکتیکا د برمل ولسوالۍ او د پاکستان د جنوبي وزیرستان ترمنځ پر پوله د انګور اډې په بازار کې د تېرې شپې نښته د طالبانو له لوري «ښکاره تېری» بللی دی.
کنډي د طالبانو د بریدونو د غندلو ترڅنګ د پاکستاني ځواکونو د «چټک، قاطع او ځپونکي غبرګون» ستاینه کړې ده.
هغه ویلي: «د افغانستان د طالبانو رژیم باید په هېڅ ډول وهم او خیال کې نه وي؛ پاکستان هېڅکله د خپلو خلکو پر وړاندې بریدونه او د خپل حاکمیت نقض نه زغمي.»
کنډي زیاته کړې چې خیبر پښتونخوا ایالت د ترهګرۍ پر وړاندې مبارزه کې زرګونه کسان له لاسه ورکړي او هېچا ته به اجازه ورنه کړي چې د دې سیمې خلک وګواښي یا یې امنیت کمزوری کړي.
د خیبر پښتونخوا ایالت د جنوبي وزیرستان د مرستیال کمېشنر دفتر وايي، د تېرې شپې د انګور اډې په نښته کې یو ملکي وګړی وژل شوی او پنځه نور ملکي وګړي، چې ټول د یوې کورنۍ غړي وو، ټپیان شوي دي.
دغه دفتر ویلي، ملکي وګړي د افغانستان د طالبانو له لوري پر استوګنیزه سیمه د ډزو له امله زیانمن شوي دي.
طالبانو تر اوسه د تېرې شپې د نښتې په اړه په رسمي ډول څه نه دي ویلي. خو په پکتیکا کې د دې ډلې امنیتي سرچینو اطلاعات روز ورځپاڼې ته تایید کړې چې په انګور اډه کې سرحدي نښته شوې او د افغانستان په لوري هم ملکي کورونه په نښه شوي دي.
