د طالبانو د بامیان پخواني والي، عبدالله سرحدي، اعتراف کړی چې په افغانستان کې د دې ډلې د لومړۍ واکمنۍ پر مهال یې د بودا تاریخي مجسمې ویجاړې کړې دي.
هغه له بيبيسي نړیوالې څانګې سره په خبرو کې ویلي: «په خپلو لاسونو مې هغه ویجاړې کړې.»
عبدالله سرحدي زیاته کړې:«هر هغه څه چې موږ ترسره کړي او ترسره کوو، د خدای له لارښوونې او قانون سره سم دي… موږ بتان ماتوو، نه دا چې وپلورو یې.»
د طالبانو پخواني والي په بامیان کې ویلي چې د بودا د تاریخي مجسمو له ویجاړولو پښېمانه نه دی او زیاته کړې: «ولې باید پښېمانه شم؟ دا د خدای غوښتنه وه.»
طالبانو د ۲۰۰۱ کال د مارچ پر ۱۱مه، د دې ډلې د پخواني مشر ملا محمد عمر په امر، په بامیان کې د بودا سترې مجسمې د چاودېدونکو توکو په کارولو او د توپونو او ټانکونو په ډزو سره ویجاړې کړې.
عبدالله سرحدي چې هغه مهال د طالبانو له پوځي قوماندانانو څخه و، اوس یې اعتراف کړی چې د دغو تاریخي مجسمو په ویجاړولو کې یې رول درلود.
د صلصال مجسمه چې ۵۳ متره لوړوالی یې درلود او د شهمامې مجسمه چې ۳۵ متره لوړه وه، د میلادي درېیمې او اوومې پېړۍ ترمنځ د افغانستان په مرکزي بامیان ولایت کې د ځانګړي سبک له مخې، د غره په تراشلو سره جوړه شوې وې.
د دغو مجسمو ویجاړول، چې د یونسکو د تاریخي اثارو په فهرست کې هم ثبت شوې وې، له پراخو نړیوالو غبرګونونو او غندنو سره مخ شول.
عبدالله سرحدي په افغانستان کې د طالبانو له بیا واکمنېدو وروسته د دې ډلې له خوا د بامیان والي وټاکل شو او د ۱۴۰۴ لمریز کال تر جدي میاشتې پورې د دغه ولایت والي پاتې شو.
د طالبانو اوسني مشر، هبتالله اخوندزاده، د ۱۴۰۴ کال د جدي میاشتې پر ۱۱مه عبدالله سرحدي د بامیان د ولایت له مقامه لرې کړ او هغه یې د جوزجان والي وټاکه. وروسته نوموړی د کندوز ولایت د «۲۱۷ عمري قولاردو» د مرستیال په توګه وټاکل شو.
