ایراني رسنیو د دغه هېواد د چارواکو په حواله راپور ورکړی چې امریکايي ځواکونو د خلیج فارس په اوبو کې د هرمزګان ولایت د کرګان بندر ته څېرمه پر دوو کب نیونکو کښتیو برید کړی او د دغو کښتیو کب نیوونکي ورک شوي دي.
د هرمزګان د والي مرستیال، احمد نفیسي، ویلي چې دغه برید د دوشنبې په ماښام (د سنبلې ۲۳مه) د یوې بېپیلوټه الوتکې له لارې شوی دی.
فارس خبري اژانس د نفیسي له قوله لیکلي چې د دغو کښتیو کب نیوونکي ورک شوي او د هغوی د موندلو لپاره د لټون عملیات لا هم دوام لري.
تر اوسه د دې پېښې نور جزئیات او د ورکو شویو کب نیوونکو شمېر نه دی خپور شوی. تېره اوونۍ هم د هرمزګان د سیریک چارواکو ویلي وو چې یوه کب نیونکې کښتۍ د امریکا له برید سره مخ شوې او یو کب نیوونکی پکې ټپي شوی و.
په یوه بله پېښه کې، چې د ایران او امریکا له جګړې سره تړاو لري، د ایران سپاه پاسداران د یوه تېلوړونکي ټانکر د سمندري ماین سره د لګېدو له امله د چاودنې خبر ورکړی دی.
د سپاه پاسداران سمندري ځواکونو په یوه خبرپاڼه کې ویلي چې د «الګایا» په نوم تېلوړونکی ټانکر غوښتل د هرمز تنګي په سوېل کې له یوې ممنوعه سیمې څخه تېر شي، چې له سمندري ماینونو سره د لګېدو له امله پرې چاودنه وشوه.
د سپاه په هغه خبرپاڼه کې چې د دوشنبې په شپه خپره شوې، ویل شوي چې د اور د مهارولو هڅې بېپایلې وې او ټوله کښتۍ په اور کې ډوبه شوې ده.
خو د امریکا د پوځ مرکزي قوماندانۍ (سنتکام) دغه خبر رد کړی دی.
سنتکام نن سهار (سهشنبه، د وږي ۲۴مه) په ایکس کې د یوې خبرپاڼې په خپرولو سره ویلي چې دا ادعا ناسم ده.
سنتکام ویلي چې د «الګایا» په نوم دغه تېلوړونکی ټانکر د پاناما بیرغ لاندې روان و، تېره میاشت د ایران له خوا د توغندي هدف وګرځېد او له کاره ولوېد.
د امریکا مرکزي قوماندانۍ زیاته کړې چې تېره اوونۍ په پای کې، کله چې دغه کښتۍ د عمان په ساحلي اوبو کې لنګر اچولی و، ایران یو ځل بیا د بېپیلوټه الوتکې په وسیله پرې برید وکړ.
د سنتکام په وینا، دغه تېلوړونکی ټانکر اوس مهال د سیمې د یوه شریک هېواد له لوري کش کېږي. د امریکا مرکزي قوماندانۍ ادعا کړې چې سپاه پاسداران د هرمز تنګي له لارې د سوداګریزو بېړیو د تګ راتګ د وېرولو او خنډ جوړولو لپاره دا ډول ادعاوې مطرح کوي.
