وروسته له هغې چې داسې راپورونه خپاره شول چې د ایران له لوري د امنیتي ګواښونو له امله د امریکا د مالیې وزیر یوې پوځي اډې ته لېږدول شوی، د ایران د بهرنیو چارو وزارت ویاند اسماعیل بقایي د واشنګټن دغه اقدامات د ځان قرباني ښودلو هڅه بللې ده.
بقایي نن (پنجشنبه، د لړم ۲۱مه) پر خپله اېکسپاڼه لیکلي، د امریکايي چارواکو پر وړاندې د ایران د امنیتي ګواښونو په اړه د واشنګټن ادعاوې د «ناسمو معلوماتو د خپرولو د کمپاین» برخه او د امریکا د قرباني ښودلو هڅه ده.
هغه زیاته کړې، امریکا له اسراییلو سره په ګډ پوځي «یرغل» کې پر ایران د بریدونو پر مهال د ایراني چارواکو او ساینسپوهانو په ترورولو سره «جنګي جنایتونه» او «دولتي ترهګري» ترسره کړې ده.
بقایي ویلي، واشنګټن اوس د «ایراني ترهګرۍ» په اړه د ناسمو سرلیکونو په خپرولو هڅه کوي چې ځان قرباني وښيي او د یوې ادعا شوې «ترهګریزې دسیسې» په اړه بېثبوته ادعاوې د خلکو په ذهنونو کې ځای کړي.
هغه ټینګار کړی چې هېڅ ډول رسنیز تبلیغات نه شي کولای د «یرغل، ترهګرۍ او جنګي جنایتونو» مسوولیت پټ کړي.
د بقایي دغه غبرګون وروسته له هغې څرګندېږي چې «نیویارک ټایمز» ورځپاڼې تېره اوونۍ راپور ورکړ چې د امریکا د مالیې وزیر سکاټ بېسېنټ د ایران له لوري د احتمالي ګواښونو په اړه د اندېښنو له امله خپل استوګنځی پرېښی او یوې پوځي اډې ته لېږدول شوی دی.
ورځپاڼې د درېیو باخبره سرچینو له قوله لیکلي چې امریکايي چارواکو ارزونه کړې، د ایران هغه پلانونه چې د اوسنیو او پخوانیو امریکايي چارواکو د په نښه کولو لپاره جوړ شوي، پرمختللي پړاو ته رسېدلي دي. د بېسېنټ پر وړاندې د ګواښونو معلومات هم د دغې ارزونې یوه برخه وه.
بسېنټ د اګست میاشتې راهیسې د ډونالډ ټرمپ د ادارې له لوري پر ایران د اقتصادي فشارونو مشري کوي.
دغه کمپاین د ایران د تېلو، سمندري لېږد، هوايي چلند، مالي او سوداګریزو شبکو په نښه کولو لپاره پیل شوی دی.
