بیرلشگن ملتلر تشکیلاتی خارجي یاردم‌نینگ قیسقریشیدن سۉنگ افغانستانده‌گی عیاللر باشچیلیگیده‌گی تشکیلاتلر و عیاللر حقوقلرینی حمایه قیلووچی تشکیلاتلر مبلغلرنینگ کېسکین کمه‌ییشیگه دوچ کېلگنی، خدمتلرینی چېکله‌گنی و خادملری‌نینگ بیر قِسمینی ایشدن بۉشه‌تگنینی معلوم قیلدی. اینیقسه، تشکیلاتلرنینگ ۸۲ فایزی یاپیلیش خوفی آستیده قالگن.
بیرلشگن ملتلر تشکیلاتی‌نینگ عیاللر بۉییچه بۉلیمی «یاردملرنینگ قیسقریشی‌نینگ عیاللر باشچیلیگیده‌گی و عیاللر حقوقلرینی حمایه قیلووچی تشکیلاتلرگه تأثیری» ناملی حساباتیده، ۲۰۲۶-ییل اپرېل آییده ۷۴ ته عیاللر تشکیلاتی اۉرته‌سیده اۉتکزیلگن سۉراونامه اساسیده، اوشبو تشکیلاتلر ۲۰۲۵-ییلدن باشلب مبلغلرنینگ قیسقریشیگه دوچ کېلگنینی بیلدیرگن.
خارجي یاردملرنینگ قیسقریشی اوشبو تشکیلاتلر فعالیتینی چېکلب، اَیریملری‌نینگ یاپیلیش خوفینی آشیرگن. جمله‌دن، تدقیقاتده قتنه‌شگن ۶۱ ته تشکیلات، یعنی ۸۲ فایزی «یاپیلیش خوفی» آستیده اېکنینی بیلدیرگن.
مذکور سۉراونامه‌ده تشکیلاتلر مسووللری ۲۰۲۵-ییل جنورییدن کېین مالیوي یاردملرنینگ قیسقریشی فعالیتلریگه قنده‌ی تأثیر قیلگنی حقیده جواب بېرگن.
حسابات نتیجه‌لریگه کۉره، سۉراوده قتنه‌شگن تشکیلاتلر نینگ ۷۲فایزی ۲۰۲۵-ییلده بودجه قیسقریشیگه دوچ کېلگن. شونینگدېک، ۴۹ ته تشکیلات، یعنی رېسپاندېنتلر نینگ ۶۶فایزی، ۲۰۲۷-ییلده مالی حالتی اۉتگن ییلگه نسبتاً «یامانلشگن» یاکه «انقراضلی» حالتگه کېلگنینی بیلدیرگن.
بیرلشگن ملتلر تشکیلاتی‌نینگ عیاللر بۉییچه بۉلیمی معلوماتیگه کۉره، تدقیقاتگه جلب قیلینگن ۷۴ ته تشکیلاتدن بیری «بوتونله‌ی» یاپیلگن. ۴۰ ته تشکیلات، یعنی ۵۴ فایزی اېسه کېلگوسی ۱۲آی ایچیده فعالیتینی وقتینچه توخته‌تیشی یاکه بوتونله‌ی یاپیلیشی احتمالی موجودلیگینی بیلدیرگن.
بو حالت دونالد ترامپ ۲۰۲۵-ییل جنوری آییده امریکا جمهور رییسی صفتیده آق اویگه قَیتگنیدن کېین یوزه‌گه کېلگن. عیناً شو دوردن باشلب ترامپ امریکا نینگ برچه خارجي یاردملرینی، خصوصاً، افغانستانگه کۉرسه‌تیله‌دیگن گومانیتار یاردملرنی توخته‌تگن.
حاضرده بیرلشگن ملتلر تشکیلاتی‌نینگ عیاللر بۉییچه بۉلیمی بودجه‌نینگ قیسقریشی افغانستانده‌گی عیاللر تشکیلاتلری و عیاللر حقوقلرینی حمایه قیلووچی تشکیلاتلرنینگ «خدمت کۉرسه‌تیش قابلیبی و صلاحیتی»گه هم تأثیر کۉرسه‌تگنینی اَیتماقده. بیرلشگن ملتلر تشکیلاتی حساباتیده رېسپاندېنتلر نینگ ۷۷ فایزی عیاللر و قیزلر احتیاجلریگه جواب بېریش امکانیتی «موجود احتیاج درجه‌سیدن پست» اېکنینی بیلدیرگن. ۸۳ فایزی اېسه عیاللر و قیزلرنینگ یاردمگه بۉلگن احتیاجی اوّلگی ییللرگه نسبتاً «آشگنینی» معلوم قیلگن.
حساباتگه کۉره، سۉراوده قتنه‌شگن تشکیلاتلرنینگ ۶۲ فایزی حاضر ۲۰۲۵-ییل جنورییدن آلدینگیگه نسبتاً کمراق عیاللر و قیزلرنی قمره‌ب آلماقده. شونینگدېک، تشکیلاتلر نینگ ۵۴ فایزی امکانیتلر چېکلنگنی سببلی عیاللر و قیزلرنی «کوتیش رۉیخطی»گه کیریتیشگه یاکه اولرنی قبول قیلمسلیککه مجبور بۉلگنینی بیلدیرگن.
خدمتلر بۉییچه تشکیلاتلرنینگ ۷۶ فایزی عیاللرگه نسبتاً زۉرآورلیک حالتلرینی باشقه‌ریش و تېگیشلی خدمتلرگه یۉنه‌لتیریش خدمتلری سېزیلرلی درجه‌ده قیسقذگنی یاکه توخته‌تیلگنینی بیلدیرگن. عیاللر و قیزلر اوچون خوفسیز مکان یره‌تیش خدمتلری هم تشکیلاتلر نینگ ۷۰ فایزیده قیسقرگن یاکه موجود بۉلمه‌گن. تیریکچیلیک و اقتصادي امکانیتلرنی کېنگه‌یتیریش خدمتلری اېسه تشکیلاتلرنینگ ۶۸ فایزیده «قیسقرگن» یاکه «ایزدن چیققن».
بودجه‌نینگ قیسقریشی اوشبو تشکیلاتلرنینگ انسان رېسورسلریگه هم تأثیر کۉرسه‌تگن. سۉراونامه‌ده قتنه‌شگن ۷۴ ته تشکیلات‌نینگ ۹۲ فایزی «خادملری‌نینگ بیر قِسمینی» یۉقاتگنینی بیلدیرگن. ۱۸ ته تشکیلاتده ایشچی کوچی‌نینگ ۶۰ فایزی یاکه اوندن کۉپراغی یۉقاتلگن، تۉقّیزته تشکیلات اېسه خادملری نینگ ۹۰ فایزیدن کۉپراغیدن اَیریلگن. خصوصاً، ۴۱ ته تشکیلات، یعنی ۵۵ فایزی، بودجه قیسقریشی‌نینگ عاقبتلریدن بیری صفتیده خادملر سانی‌نینگ کمه‌ییشی یاکه ایش فعالیتی‌نینگ توخته‌تیلیشینی قید اېتگن.
بیرلشگن ملتلر تشکیلاتی حساباتیده، شونینگدېک، تشکیلاتلرنینگ ۶۵ فایزی فعالیتینی دوام اېتتیریش اوچون «حق تۉله‌نمه‌یدیگن خادملر» یاکه کۉنگیللیلردن فایده‌لنگنی، ۵۴ فایزی اېسه خادملرگه تۉله‌نه‌دیگن معاشلرنی شرطنامه‌لرده کۉرسه‌تیلگن مقداردن پست درجه‌گه توشیرگنی ایتیلگن.
بیرلشگن ملتلر تشکیلاتی‌نینگ عیاللر بۉییچه بۉلیمی افغانستانده‌گی عیاللر باشچیلیگیده‌گی تشکیلاتلر و عیاللر حقوقلرینی حمایه قیلووچی تشکیلاتلر اۉز فعالیتلری‌نینگ اساسي خرجتلرینی قاپلش اوچون ماسلشووچن و کۉپ ییللیک بودجه اساسیده مالیه‌لشتیریشنی طلب قیله‌یاتگنینی بیلدیرگن. تشکیلاتلر فعالیتیگه قۉییلگن چېکلاولرنی حسابگه آلگن حالده، اولر نینگ اکثریتی مبلغلرنینگ تۉغریدن-تۉغری اجره‌تیلیشینی و دونرلرنینگ عیاللر تشکیلاتلری بیلن بې‌واسطه علاقه قیلیشینی طلب قیلگن.
