بیرلشگن ملتلر تشکیلاتینینگ باش کاتبی آنتونیو گوترش بیرلشگن ملتلر تشکیلاتینینگ سابق انسان حقوقلری بۉییچه عالي کمیساری و خلق‌ارا محکمه ناوانتم ناوی پیلاوی تینچلیک بۉییچه نوبل مکافاتینی آلگنی بیلن تبریکله‌دی.
بیرلشگن ملتلر تشکیلاتینینگ باش کاتبی بوگون (جمعه، ۱۷-میزان) کېچقورون ایکس اجتماعي ترماغیده یازیشیچه، خانیم پیلاوی نینگ اوشبو مکافاتنی آلیشی «خلق‌ارا حقوق، قانون اوستوارلیگی و انسان حقوقلرینی حمایه قیلیش، شونینگدېک، تینچلیک، عدالت و انسان قدر-قیمتینی تأمینلش یۉلیده حرکت قیله‌یاتگن برچه انسانلرگه حرمت افاده‌سیدیر».
گوترش خانیم پیلاوی نینگ فعالیتیگه توخته‌لیب، او «قانون کوچی زۉرآورلیک قانونیدن اوستون کېلیشی کېره‌کلیگینی و انسان حقوقلرینی حمایه قیلیش عدالتسیزلیککه قرشی اېنگ ایشانچلی پناه اېکنینی دایما نمایان اېتیب کېلگنینی» تأکیدله‌دی.
بوگون ناروی نوبل کمیته‌سی خلق‌ارا تینچلیک و حقوقنی ترغیب قیلیش یۉلیده‌گی سعی-حرکتلری اوچون پیلاوی ۲۰۲۶-ییلگی تینچلیک بۉییچه نوبل مکافاتی لاوریاتی دېب اعلان قیلدی.
نوعی پیلاوی جَنوبي افریقا عالي محکمه‌سیده، رواندا بۉییچه خلق‌ارا جنایي تریبونالی و خلق‌ارا جنایي محکمه‌ده قاضی صفتیده فعالیت یوریتگن.
شونینگدېک، او ۲۰۰۸-ییلدن ۲۰۱۴-ییلگچه بیرلشگن ملتلر تشکیلاتینینگ انسان حقوقلری بۉییچه عالي کمیساری بۉلگن. یقین وقتگچه اېسه بیرلشگن ملتلر تشکیلاتینینگ باسیب آلینگن فلسطین حدودی بۉییچه مستقل خلق‌ارا تېرگاو کمیسیونسیگه رئیسلیک قیلگن.
حاضرده خانیم پیلاوی میانمارگه قرشی جینوساید عیبلاوی کۉریب چیقیله‌یاتگن ایش بۉییچه خلق‌ارا محکمه قاضی‌سی حسابلنه‌دی.
