ایران دولت اخبارات آژانسی ایرنا خبریگه کۉره، قطر هیئتی ایران رسميلری بیلن مذاکره و مصلحتلشوولر اۉتکزیش مقصدیده بوگون (جمعه، ۸عقرب) اېرته‌لب تهرانگه یېتیب بارگن.
آژانس خبریده ایتیلیشیچه، هیئتگه قطر باش وزیری و تشقی ایشلر وزیری نینگ کتّه مصلحتچیسی رهبرلیک قیلماقده.
ایرنا نینگ قۉشیمچه قیلیشیچه، قطر هیئتی‌نینگ ایران رسميلری بیلن اوچره‌شوولریده ایکّی تامانله‌مه ایران–قطر مناسبتلری همده منطقه‌ده‌گی سۉنگگی واقعه‌لر یوزه‌سیدن مذاکره و مصلحتلشوولر اۉتکزیلیشی رېجه‌لشتیریلگن.
رویترز اخبارات آژانسی هم قطر هیئتی امریکا بیلن موافقلشتیریلگن حالده تهرانگه قَیتگنینی خبر قیلگن.
قطر هیئتی شو هفته یک‌شنبه کونی هم تهرانگه تشریف بویوریب، ایرانگه تینچلیک رېجه‌سی‌نینگ لایحه‌سینی تقدیم اېتگن اېدی.
مذاکره‌لردن خبردار منبع نینگ رویترزگه ایتیشیچه، ایران مذکور رېجه‌نی مقبول اېمس، دېب بهاله‌گن و هستوي مسأله‌لر بۉییچه اۉز موضیعده قطعي قالگن.
واشنگتم هستوي مسأله‌لر مذاکره‌لرنینگ دستلبکی باسقیچیدناق کون ترتیبیگه کیریتیلیشینی ایسته‌ماقده. تهران اېسه آمریکا اوّلا بندرلرنی قمل قیلیشنی توخته‌تیشی و نفت اېکسپورتیگه قۉییلگن چېکلاولرنی بېکار قیلیشی کېره‌کلیگینی تأکیدله‌ماقده.
شو بیلن بیرگه، ایران تشقی ایشلر وزیری عباس عراقچی چهارشنبه کونی مملکتی یقین شرقده‌گی اوروشنی توگه‌تیشگه قره‌تیلگن «یېتّی کونلیک رېجه»نی عملگه آشیریشگه آلیب کېله‌دیگن غایه‌لرنی کۉریب چیقیش مقصدیده قطر واسطه‌چیلری بیلن علاقه‌لرنی دوام اېتتیره‌یاتگنینی ایتگن.
ایران رسميلری حاضرچه قطر هیئتی نینگ تهرانگه تشریفی یوزه‌سیدن رسماً بیانات بېرمه‌گن.
