ونزوئلاده کېتمه-کېت۷.۲ و۷.۵ریشترلی ایکّی زلزله یوز بېریب، پایتخت کاراکاس شهریده کېنگ کۉلملی ویرانهگرچیلیکلر و کۉپلب قربانلرگه سبب بۉلدی.
امریکا قۉشمه ایالتلری زمینشناسلیک خدمتی معلوماتیگه کۉره، حادثه چهارشنبه کېچهسی (۳-سرطان) محلي وقت بیلن ساعت ۲۰:۴۰ اطرافیده یوز بېرگن.
مذکور مرکزنینگ بیلدیریشیچه، دستلب کاراکاسدن تخمیناً۲۸۴ کیلومتر غربده جایلشگن سن فیلیپه یقینیده۷.۲ریشترلی زلزله صادر بۉلگن. آرهدن کۉپ اۉتمهی، پایتختدن۲۹۳ کیلومتر غربده جایلشگن یوماره یقینیده۷.۵ریشترلی کوچلیراق زلزله یوز بېرگن.
امریکا قۉشمه ایالتلری زمینشناسلیک خدمتی احتمالي قربانلر سانینی۱۰ مینگدن۱۰۰ مینگ نفرگچه دېب بهالهگن.
کاراکاس شهریده و اونینگ اطرافیدن ترقهلگن تصویرلرده کېنگ کۉلملی ویرانهگرچیلیکلر عکس اېتگن، بیراق حاضرگچه انساني تلفاتلر بۉییچه انیق حسابات اعلان قیلینمهگن.
ونزوئلا مؤقت جمهور رییسی دلسی رودریگز مملکتده فوق العاده حالت اعلان قیلگن و قوتقروو ایشلری بیلن بیر قطارده ضرر و تلفاتلر کۉلمی هم بهالنهیاتگنینی بیلدیرگن.
ونزوئلا ایچکی ایشلر وزیری دیوسدادو کابلو دولت تلویزیونی آرقهلی یۉلهگن مراجعتیده شوندهی دېگن: «بیزده قولهب توشگن بنالر، اویلر و تورر جایلر موجود. خوفسیزلیک و فقرالیک یاردمی ساحهسیدهگی برچه امکانیتلریمیز بیلن وضعیتنی نظارت قیلیشگه حرکت قیلیهپمیز.»
اونینگ ایتیشیچه، «اۉت اۉچیرووچیلر، پولیس و برچه تېگیشلی خدمتلر سفربر قیلینگن.»
دیوسدادو کابلونینگ سۉزلریگه کۉره، کاراکاس شهریده آلتامیرا منطقهسی «جدّي تشویشلی وضعیت»گه دوچ کېلگن و او یېرده بیر نېچته بنالر قولهب توشگنی حقیده خبر بېریلگن.
وزیر هیداوچیلردن یۉللرنی بۉشهتیشنی سۉرب، فوق العاده خدمتلر قوتقروو عملیاتلرینی عملگه آشیریشی و جراحتلنگنلرگه یاردم کۉرسهتیشی اوچون شرایط یرهتیشگه چقیردی.
چهارشنبه کونی رسمي دَم آلیش کونی بۉلگنی احتمالي قربانلر سانی نینگ کۉپهییشیگه آلیب کېلگن.
مذکور کون ۱۸۲۱ییلده ونزوئلا اسپانیادن مستقللیک اوروشی ییللیگی مناسبتی بیلن عمومخلق بیرهمی صفتیده نشانلنگن.
کۉپلب ونزوئلا یشاوچیلری، اینیقسه کاراکاس اهالیسی، زلزله یوز بېرگن پیتده اویلریده بۉلگن.
کاراکاس نینگ دنیا بیلن اساسي هوا دروازهسی حسابلنگن سیمان بالیور خلقارا قۉنالغهسی جدّي ضرر کۉرگچ، فعالیتینی تۉختهتگن.
ونزوئلا پارلمانی اعضاسی ویلمر آزواخه اجتماعي ترماقلرده نشر قیلگن ویدیوده قۉنالغه تېرمیناللریده ویرانهلر قولهیاتگنی و آدملر واهمه ایچیده بنانی ترک اېتهیاتگنی تصویرلنگن.
