بریتانيا دېنگیز خوفسیزلیگی آژانسینینگ معلوم قیلیشیچه، هرمز بۉغازیده بیر نفت تانکری نامعلوم سنارید ضربهسیگه اوچرهگن و اونینگ باشقروو کۉپریگی شکستلنگن.
رویترز خبریگه کۉره، اگېنتلیک اوشبو هجومده تانکر خدمهسی ضرر کۉرمهگنینی و اولرنینگ برچهسی ساغ-سلامت اېکنینی بیلدیرگن.
خبرده ایتیلیشیچه، بویوک بریتانيا دېنگیز خوفسیزلیگی آژانسی هجومنی قَیسی دولت عملگه آشیرگنی همده نشانگه آلینگن تانکېر قَیسی دولت بیراغی آستیده حرکتلنگنی حقیده معلومات بېرمهگن.
بو ایران و امریکا اۉرتهسیده کېلیشوو امضالنگنیدن کېین هرمز بۉغازیده کېمهلر و نفت تانکرلریگه اویوشتیریلگن ایکّینچی هجومدیر.
پنجشنبه کونی هم بۉغازده بیر تجارت کېمهسی هجومگه اوچرهگنی حقیده خبر بېریلگن اېدی.
امریکا مرکزي قوماندانلیگی (سنتکام) کېچه تونده ایراننی اۉشه تجارت کېمهسیگه هجوم قیلیشده عیبلب، ایراننینگ راکت و درون انبارلری همده قیرغاقدهگی رادار اۉبژېکتلریگه ضربه بېرگنینی معلوم قیلدی.
شوندن سۉنگ اسلام انقلابی قۉریقچیلری دېنگیز کوچلری بیانات بېریب، امریکا نینگ ایران قیرغاق حدودلریگه اویوشتیرگن هوا هجوملری و اسرایل نینگ لبنان جَنوبیده صلحنی بوزیشیگه جوابن منطقهدهگی امریکا حربي نقطهلریگه ضربه بېرگنینی بیلدیردی.
ایران حاضرگچه هرمز بۉغازیدهگی کېمهلر و نفت تانکېرلریگه هجوم قیلگنینی رسماً تصدیقلهمهگن.
بیراق دولت یېتکرمهلری اسلام انقلابی قۉریقچیلری «ناقانوني یۉلک» آرقهلی اۉتیشگه اورینگن کېمهلر تامان «آگاهلنتیرووچی اۉق اوزگنی» حقیده خبر بېرگن.
ایران و امریکا اۉرتهسیدهگی کېلیشوودن سۉنگ هرمز بۉغازی کېمهلر و نفت تانکرلرینینگ قتناوی اوچون قَیته آچیلگن اېدی. سۉنگّی ایکّی هفته دوامیده او یېردن اۉنلب تجارت کېمهلری و نفت تانکرلر اۉتگن. بیراق ایران و امریکا اۉرتهسیدهگی ینگی کېسکینلیکلر اوشبو مهم دېنگیز یۉلیدهگی کېمهلر قتناوی همده ایکّی دولت اۉرتهسیدهگی صلح تقدیرینی ناانیق حالتگه کېلتیریب قۉیدی.
