خلق ارا یېتکرمهلر خبرلریگه کۉره، فرانسهنینگ شِمالی-شرقیدهگی «تومبلاین» شهریده کیچیک اوچاق قولهشی عاقبتیده کمیده ۱۱ کیشی جان بېرگن.
رویترز خبرگزارلیگی خبریگه کۉره، فرانسه رسميلری اوچاق بوگون (یکشنبه، ۷-سرطان) محلي وقت بیلن ساعت ۱۱:۰۰اطرافیده، هواگه کۉتریلگنیدن کۉپ اۉتمهی قولهگنینی معلوم قیلگن.
خبرده اَیتیلیشیچه، اوچاق پاراشوت بۉییچه اۉقوو مرکزی تامانیدن فایدهلنیلگن بۉلیب، هلاک بۉلگنلر آرهسیده بیر نفر اوچووچی، بېش کیشی مربی و بېش کشی آموزگار بار.
واقعه گواهلریدن بیری رویترزگه اوچاق بلندلیککه کۉتریلهیاتگن پیتده موتور آوازی تۉستدن اۉچیب قالگنینی، گۉیا موتور ایشلهمهی قالگندېک بۉلگنینی اَیتگن. اونینگ سۉزلریگه کۉره، قولهشدن آلدین یانغین، پارتلش یاکه باشقه کۉزگه کۉرینهدیگن علامت کوزهتیلمهگن.
محلي رسميلردن بیری اوچاق تورر جای حدودیده، سودا مرکزی یقینیگه دېیرلی تیک حالتده قولهگنینی، اونینگ قالدیقلری اېسه بایسکل یۉلهگیگه ساچیلیب کېتگنینی بیلدیرگن.
حاضرچه قولش سببی انیقلنمهگن. فرانسه ایچکی ایشلر وزیری واقعه جاییگه یۉل آلگنینی و حادثه یوزهسیدن تېرگاو باشلنیشینی معلوم قیلگن.
بو بوگون دنیانینگ تورلی مملکتلریده قید اېتیلگن ایکّینچی اوچاق قولهشی دیر. آلدینراق سعودیه عربستانینینگ رآس تنوره منطقهسیده آرامکو شرکتیگه تېگیشلی تیک اوچر قولهشی عاقبتیده ۱۴ کیشی هلاک بۉلگنی حقیده خبر بېریلگندی.
