بریتانیا ینگی “مهاجرت و باشپناه” قانون لایحهسیده باشپناه آلووچیلر ایشگه جایلشگنیدن سۉنگ دولت تامانیدن اولرنی جایلشتیریش و مالیوي قۉللب-قوّتلش اوچون صرفلنگن۱۰ مینگ پوند قَیتریشی کېرهکلیگی حقیدهگی تکلیفنی ایلگری سوردی.
گاردین کوندهلیگی دوشنبه (۸سرطان) بریتانيا ایچکی ایشلر وزیری شبانه محمودگه تهیهنیب خبر بېریشیچه، باشپناه آلووچیلر اوشبو مبلغنی باسقیچمه-باسقیچ تۉلهشلری ممکن بۉلهدی.
شبانه محمودنینگ ایتیشیچه، مذکور رېجه باشپناه آلووچیلرگه “یاردم آلیش حقوقدیر، اما او بیلن بیرگه مسوولیت هم کېلهدی” دېگن تمایلنی اېسلهتیشگه قرهتیلگن.
او شوندهی دېدی: “آدملر جمعیتگه حصه قۉشیش و بریتانيا خلقینینگ سخاوتینی قَیتریش امکانیتیگه اېگه بۉلگچ، بیز اولردن شونی کوتهمیز.”
بریتانياده باشپناه ایزلاوچیلر عادتده اولرنینگ عریضهسی کۉریب چیقیلهیاتگن دورده مالیوي یاردم همده تورر جای بیلن تأمینلنهدی.
ینگی “مهاجرت و باشپناه” قانون لایحهسی باشپناه آلووچیلرگه نسبتاً قطار ینگی مجبوريتلرنی جاري اېتیشنی نظرده توتهدی.
قانون لایحهسی بوگون (سهشنبه،۹-سرطان) حکومت کابینهسی تامانیدن بریتانيا پارلمانیگه تقدیم اېتیلیشی رېجهلشتیریلگن.
لایحهگه کۉره، یېترلی مالیوي امکانیتگه اېگه بۉلگن برچه وایهگه یېتگن شخصلر دایمي یشش حقوقینی آلیشدن آلدین دولتدن آلگن یاردم نینگ 10 مینگ پوندنی قَیتریشی لازم بۉلهدی.
بیراق بریتانيا ایچکی ایشلر وزیرلیگی حاضرچه اوشبو مبلغنی قَیتریش مجبوريتی درآمد مقداریگه باغلیق یاکه باغلیق اېمسلیگی، شونینگدېک، آیلیک تۉلاولرنی باشلش اوچون قندهی درآمد چېگرهسی بېلگیلنیشی حقیده معلومات بېرمهگن.
بو حالت افغانستانگه کۉرسهتیلهیاتگن انسان پرورلیک یاردم حجمی قیسقرهیاتگن بیر پیتده کوزهتیلماقده.
