بنگلادش نینگ سابق باش وزیری شیخ حسینه، اۉز مملکتیده سیرتدن اۉلیم جزاسیگه حکم قیلینگنیگه قرهمهی، رویترز خبرگزارلیگیگه بېرگن تېلفونی صحبتیده جاري ییل دسامبر آییده هندستاندهگی سورگوندن بنگلادشگه قَیتیب، محکمهگه اختیاري روشده تسلیم بۉلیشینی معلوم قیلدی.
بوگون (جمعه، ۱۹-سرطان) نشر قیلینگن انترویده او «عوامی لیگ»حزبی نینگ یوقاری مرتبهلی اعضالری بیلن بیرگه اختیاري روشده بنگلادشگه قَیتیب، محکمه مجلسیده قتنهشیشنی رېجهلشتیرهیاتگنینی ایتدی.
شیخ حسینه شوندهی دېدی: «قَیتگنیمدن کېین مېنی حبسگه آلیشلری، حتا اۉلدیریشلری هم ممکن. شونگه قرهمهی، قَیتیشیم کېرهک. حزبیم رهبرلری و اعضالری کوچلی باسیم همده تعقیب آستیده. اگر اۉلیشیم کېرهک بۉلسه، آته-آنهم دفن اېتیلگن و اولر نینگ قانی تۉکیلگن یورتده اۉلیشنی ایستهیمن.»
شیخ حسینه حکومتی ۲۰۲۴ییل اگست آییده بنگلادشدهگی محصللر نمایشلری آرتیدن اغدریلگن و او تیک اوچرده داکادن دهلیگه قاچگن اېدی.
بنگلادش نینگ حربي جنایتلر بۉییچه مخصوص محکمهسی ۲۰۲۵ییل نوامبر آییده شیخ حسینهنی سیرتدن اۉلیم جزاسیگه حکم قیلیب، اونی محصللر قۉزغآلانینی قانلی طرزده باستیریشگه بویروق بېرگنلیکده عیبدار دېب تاپگن.
بنگلادش نینگ عملدهگی حکومتی، شونینگدېک، شیخ حسینه باشچیلیگیدهگی «عوامی لیگ» حزبی فعالیتینی تعقیقلهگن همده حزبنینگ قطار یوقاری مرتبهلی اعضالری و سابق حکومت عملدارلریگه نسبتاً اۉلیم جزاسی و قماق حکملرینی چیقرگن.
شیخ حسینه هندستانگه قاچگنیدن بېری بنگلادش حکومتی بیر نېچه بار اونی استرداد قیلیشنی سۉرهگن. بیراق بو اونینگ مملکتگه اختیاري روشده قَیتیشینی و بو نینگ اوچون انیق مدت بېلگیلهگنینی ایلک بار اعلان قیلیشی بۉلدی.
او رویترز خبر آژانسیگه شوندهی دېدی: «اولر مېنی بنگلادشگه قَیتریشنی ایستهماقده و هندستانگه استرداد بۉییچه بیر نېچه بار مراجعت قیلگن. اما مېن اۉزیم قَیتهمن.»
سابق باش وزیر نینگ ایتیشیچه، حزبینینگ دېیرلی برچه رهبرلری و کۉپلب اعضالریگه قرشی جنایت ایشلری آچیلگن، اولرنینگ اکثریتی یشیرینیب یوریشگه مجبور بۉلگن. شو باعث او برچهنی بیرگهلیکده محکمهگه چیقیشگه چقیرگن.
شیخ حسینه عدالتگه ایشانیشینی بیلدیریب، محکمه جریانی باشلنگچ، آدملر بو محکمهنینگ قنچهلیک «نمایشکارانه» اېکنینی کۉریشیگه ایشانیشینی و بونی اثباتلهماقچی اېکنینی تأکیدلهدی.
او بنگلادشگه قَیتیشی مسألهسیده مملکت نینگ عملدهگی رسميلری بیلن هېچ قندهی مخفي مذاکره آلیب بارمهگنینی و خارجي دولتلر بیلن هم مصلحتلشمهگنینی ایتدی.
شیخ حسینه قماققه توشیشدن قۉرقمسلیگینی بیلدیریب، ایلگری هم بیر نېچه بار حبسگه آلینگنینی اېسلهتدی.
او ۱۹۸۱-ییلده سورگوندن قَیتگچ، بنگلادشدهگی حربي حکومتگه قرشی کورهش دوریده بیر نېچه مرته حبسگه آلینگن. شونینگدېک، ۲۰۰۷-ییلده اوردو قۉللب-قوّتلهگن مؤقت حکومت تامانیدن فسادده عیبلنیب قماققه تشلنگن، کېینچهلیک آزاد اېتیلگن و ۲۰۰۸-ییلگی سیلاولرده غلبه قازانیب، 16 ییل دوامیده حاکمیتده قالگن.
شیخ حسینه نینگ سۉزلریگه کۉره، بو سفر او حیاتیگه تهدید کوچهیگنی و نمایشچیلر اونینگ قرارگاهیگه یقینلشگنی سببلی مملکتنی ترک اېتیشگه مجبور بۉلگن.
او خلق اونینگ حکومت فعالیتیگه اۉزی بها بېریشی و قرارنی خلق نینگ اۉزی قبول قیلیشی کېرهکلیگینی تأکیدلهدی.
«حکومت اوزاق وقت حاکمیتده قالسه، خطالر بۉلیشی ممکن. هېچ بیر حکومت خطالردن خالی اېمس. اما حکومت فعالیتی نینگ یخشی یاکه یامان، تۉغری یاکه ناتۉغری اېکنیگه بها بېریش خلق نینگ حققیدیر. بو حکمنی خلق نینگ اۉزیگه قالدیرهمن»، – دېدی او.
شیخ حسینه «عوامی لیگ» حزبینی قَیته تشکیل اېتیش مقصدیده بنگلادش پارلمانی نینگ۳۰۰سیلاو بۉلگهیدن۱۲۵ تهسی وکیللری بیلن آنلاین اوچرهشوولر اۉتکزگنینی هم معلوم قیلدی.
سۉنگیده او شوندهی دېدی: «مېنی حکم قیلیشگن بۉلیشی ممکن و احتمال سیلاولرده نامزاد بۉله آلمهسمن. اما نیمه اوچون «عوامی لیگ» فعالیتی تۉختهتیلیشی کېرهک؟ اگر بیز یامان ایشلهگن بۉلسک، بونگه خلق بها بېرسین.»
شیخ حسینه حاکمیتی نینگ دستلبکی ییللریده دېموکراسی طرفداری صفتیده تنیلگن و۱۷۰ میلیون اهالیگه اېگه مسلمانلر کۉپچیلیکنی تشکیل اېتهدیگن بنگلادش اقتصادیاتینی یخشیلهگنی اوچون خلقارا اعترافگه سزاوار بۉلگن.
بیراق اونینگ اوزاق دوام اېتگن باشقرووی مخالفتنی باستیریش و دېموکراتیک نهادلرنی ضعیفلشتیریش حقیدهگی عیبلاولر بیلن همراه بۉلدی. شیخ حسینه بو عیبلاولرنی دایما رد اېتیب کېلگن.
بیرلشگن ملتلر تشکیلاتی معلوماتلریگه کۉره، اونینگ حکومتی قولهشیگه آلیب کېلگن نمایشلرنی باستیریش جریانیده قریب بیر مینگ ۴۰۰ کیشی هلاک بۉلگن.
شیخ حسینه حکومتی قولهگنیدن سۉنگ بنگلادش نوبل تینچلیک مکافاتی ساورینداری محمد یونس باشچیلیگیدهگی مؤقت حکومت تامانیدن باشقریلدی.
