امریکا سناتوری، اسرایلنی قۉللب-قوّتلهگن و ایرانگه نسبتاً قطعي مخالفت بیلن تنیلگن لیندسی گراهام کوتیلمهگنده وفات اېتدی.
اونینگ ادارهسی ایکس اجتماعي ترماغیدهگی بیاناتیده سناتور لیندسی گراهام شنبه (۲۰-سرطان) کونی توشدن کېین «قیسقه و کوتیلمهگن خستهلیک»دن سۉنگ۷۱یاشیده عالمدن اۉتگنینی معلوم قیلدی.
بیاناتده شوندهی دېییلهدی: « لیندسی گراهام نینگ عایلهسی اوشبو آغیر دَملرده بیلدیرهیاتگن دعالرینگیز اوچون منّتدار و شو دورده اولرنینگ شخصي حیاتیگه حرمت بیلن یاندهشیشینگیزنی سۉرهیدی.»
لیندسی گراهام امریکانینگ جَنوبي کارولینا ایالتیدن سیلنگن نفوذلی جمهوریتچی سناتور اېدی. او دایما امریکا جمهور رییسی دونالد ترامپ نینگ اسرایلنی قۉللب-قوّتلش و ایرانگه قرشی سیاستینی قۉللب-قوّتلب کېلگن.
اسرایل ملي خوفسیزلیک وزیری ایتامار بن گویر سناتور گراهام نینگ وفاتیگه مناسبت بیلدیریب، «بوگون اسرایل اۉزینینگ اېنگ یقین دۉستلریدن بیرینی یۉقاتدی»، دېدی.
او ایکس اجتماعی ترماغیده شوندهی یازدی: «سناتور لیندسی گراهام حقیقت و عدالت یۉلیده اسرایل یانیده توردی. اونینگ چېکسیز قۉللب-قوّتلشی، جسارتی و قطعي اخلاقي موضعی میلیونلب اسرایللیکلرنینگ حرمتیگه سزاوار بۉلدی. اسرایل دولتی اونینگ دۉستلیگی، چېکسیز یاردمی و مملکتیمیز خوفسیزلیگیگه صادقلیگینی دایما یادده سقلهیدی.»
لیندسی گراهام ۲۰۰۳-ییلدن بویان امریکا کانگرسی سنا مجلسی اعضاسی اېدی.
