رویترز خبرگزارلیگینینگ خبر بېریشیچه، ایران امریکا مملکتنینگ برق آستقورمهلریگه هجوم قیلگن تقدیرده، یمندهگی حوثيلردن قیزیل دېنگیزدهگی نفت یۉلینی یاپیشگه تیار توریشنی سۉرهگن. بو اېسه جهان انرژی تأمیناتی اوچون ینگی و جدّي تهدید صفتیده بهالنماقده.
رویترز ایکّی نفر یوقاری مرتبهلی ایرانلیک منبع و موضوعدن خبردار منطقوي منبعگه تهیهنیب یازیشیچه، ایران رهبرلری اوشبو رېجهنی محاکمه قیلگن و اونی حوثيلرگه هم یېتکزگن.
منبعلرگه کۉره، حوثيلر بو طلبدن خبردار، بیراق او قندهی یېتکزیلگنی و بو امریکا جمهور رییسی دونالد ترامپنینگ سهشنبه کونگی ایران برق آستقورمهلریگه ضربه بېریش تهدیدیدن کېین بۉلگن-بۉلمهگنی حقیده قۉشیمچه معلومات بېریلمهگن.
رویترزنینگ یازیشیچه، ایران تشقی ایشلر وزیرلیگی و حوثيلر مطبوعات سۉزلاوچیسی خبرگزارلیکنینگ ایضاح سۉراویگه درحال جواب بېرمهگن.
شونینگدېک، رویترز حوثيلرگه یقین منبعگه تهیهنیب خبر بېریشیچه، گروه بابالمندب بۉغازی یقینیگه راکتلر و درونلرنی جایلشتیرگن همده کېمهلرگه هجوم قیلیش اوچون تیارگرلیکنی یکونلهگن.
منبع نینگ ایتیشیچه، حوثيلر قیزیل دېنگیزدهگی تجارت کېمهلریگه هجوم قیلیش بۉییچه بویروقنی کوتماقده.
رویترز خبریگه کۉره، عینِ پیتده ایران اسلام انقلابی قۉریقچیلر وکیللری یمنده بۉلیب توریبدی و بابالمندب بۉغازینی قچان یاپیش حقیدهگی قرارنی اولر نظارت قیلهدی.
حوثيلر اوّل هم غزه اوروشی دوریده قیزیل دېنگیزدهگی کېمهلرگه هجوم قیلیب، اوشبو دېنگیز یۉلیدهگی خلقارا یوک تشیش قتناوینی ایزدن چیقرگن اېدی.
هرمز بۉغازی یاپیق تورگن بیر پیتده، اگر حوثيلر قیزیل دېنگیزدهگی کېمهلر یاکه بندرلرگه هم هجوم قیلسه، یقین شرقنینگ ایکّی اساسي نفت صادرات یۉلی بیر وقتنینگ اۉزیده ایزدن چیقیشی، بو اېسه نهفقط گلوبل انرژی بحرانینی چوقورلشتیریشی، بلکه ایران و امریکا اۉرتهسیدهگی ماجرانینگ ینگی باسقیچینی باشلب بېریشی ممکن.
