بریتانیا پولیسی امریکا ایرانگه قرشی هجوملرده فایده‌لنه‌یاتگن «فرفورد» هوا بازه‌سی یقینیده قۉلگه آلینگن بېش نفر گمان. دارنینگ برچه‌سی بریتانیا یشاوچیلری اېکنینی معلوم قیلدی.
رویترز خبریگه کۉره، بریتانیا پولیسی بوگون (دوشنبه، ۶-میزان) گماندارلرنینگ برچه‌سی ۲۰ یاشلرنینگ اۉرته‌لریده اېکنی و لندنده استقامت قیلیشینی معلوم قیلگن.
بریتانیا پولیسی تیناوون «فرفورد» هوا بازه‌سی اطرافیده جدّي خوفسیزلیک حادثه‌سی یوز بېرگنینی و بېش نفر اېرکک قۉلگه آلینگنینی بیلدیرگن اېدی.
بریتانیا پولیسی‌نینگ تروریزمگه قرشی کوره‌ش بۉلیمی حاضرده قۉلگه آلینگن شخصلرنینگ فعالیتی، اولرنینگ واقعه‌دن قنچه‌لیک خبردار بۉلگنی همده بو حادثه آرتیده بۉلیشی ممکن بۉلگن هر قنده‌ی سبب و مقصدلرنی تۉلیق انیقلش اوستیده ایش آلیب باره‌یاتگنینی ایتگن.
بریتانیا پولیسی‌نینگ تروریزمگه قرشی کوره‌ش بۉلیمی اوشبو هجوم/حادثه‌‌نینگ ماتیوی حقیده تورلی تخمینلر بیلدیریله‌یاتگنیدن خبردار اېکنینی، بیراق اولرگه ایشنی انیق و شفّاف طرزده دوام اېتتیریش اوچون وقت و امکان بېریلیشینی سۉره‌گن.
بی‌بی‌سی‌نینگ یازیشیچه، بریتانیا پولیسی بو شخصلرنی پارتلاوچی مادّه‌لر تۉغریسیده‌گی قانون دایره‌سیده جنایت صادر اېتگنلیکده گمان قیلیب، شونینگدېک، ترورچیلیک حرکتیگه تیارگرلیک کۉرگنلیکده گمان قیلیب قۉلگه آلگن.
اوشبو نشر خبریگه کۉره، «محلي دقهانلر یک‌شنبه کونی تانگده بازه یقینیده نقاب و باش کییم کيگن بیر گروه اېرککنی کۉرگن. اولر اوچته آق فورگان بیلن یۉلنی تۉسیب قۉیگن و دهقانلر پولیس‌گه قۉنغیراق قیلگن».
بریتانیا مدافعه وزیری وس استریتینگ بی‌بی‌سی بیلن صحبتده ایرانگه اوشبو حادثه‌گه علاقه‌دارلیک بارمی، دېگن سوالگه: «حاضرچه بو شخصلرنینگ ماتیوی حقیده تخمین قیلیش تۉغری اېمس»، دېب جواب بېرگن.
امریکا جمهور رییسی دونالد ترامپ هم اوشبو حادثه یوزه‌سیدن ژورنالیستلرگه «فرفورد» بازه‌سی یقینیده قۉلگه آلینگن شخصلر «کتّه ضرر یېتکزیش نیتیده بۉلگنینی» ایتگن.
او قۉشیمچه قیلگن: «بیز اولرنی کوزه‌توو آستیده اوشلب تورگن اېدیک. اولر بازه‌میزگه کتّه ضرر یېتکزیشنی رېجه‌لشتیرگن اېدی و بریتانیا تامانی بیلن همکارلیک جوده یخشی کېچدی… بیز تورلی اداره‌لر بیلن همکارلیک قیلدیک. اولرنی اوزاق وقت کوزه‌تیب باردیک و نهایت قۉلگه آلدیک… عجایب. بریتانیا بیلن همکارلیک؛ جوده زۉر ایش عملگه آشیریلدی.»
انگلستان‌نینگ جَنوبی-غربي قِسمیده جایلشگن فرفورد حربي بازه‌سی امریکانینگ اروپاده‌گی آغیر بامباردمانچی اوچاقلری اوچون یگانه اۉپیرا‌تسیان بازه‌سیدیر. امریکا ایرانگه قرشی اوروشده‌گی عملیاتلری اوچون اوشبو بازه‌دن فایده‌لنگن.
بی‌بی‌سی خبریگه کۉره، اوشبو بازه ساووق اوروش دوریده و کېینچه‌لیک ۱۹۹۱-ییلده‌گی بیرینچی فارس کۉرفزی اوروشی پیتیده امریکا حربي-هوا کوچلری‌نینگ استراتژیک قوماندانلیگی تصرفیده بۉلگن.
امریکا حربی-هوا کوچلری‌نینگ ب-۵۲بامباردمانچی اوچاقلری هم ۲۰۰۳-ییلده عراققه اویوشتیریلگن هجوملرده فرفورد هوا بازه‌سیدن هواگه کۉتریلگن.
