طالبلرنینگ هراتده‌گی ولایت حاکملیگی اداره‌سی هرات–خواف تېمیر یۉلی‌نینگ تۉرتینچی قِسمی نینگ بیرینچی باسقیچیدن فایده‌لنیش بوگون (دوشنبه، ۶-میزان) باشلنگنینی معلوم قیلدی.
طالبلرنینگ هراتده‌گی حاکمی نور احمداسلام‌جار «اوشبو لایحه‌دن فایده‌لنیشنی اقتصادي رواجلنیش همده هرات‌نینگ ترانزیت و منطقوي سودا ساحه‌سیده‌گی رۉلینی کوچه‌یتیریش یۉلیده‌گی مهم قدم» دېب اته‌گن.
طالبلرنینگ تېمیر یۉل اداره‌ی باشلیغی عبدالکریم فاتح هم اوشبو لایحه تېمیر یۉل ترانسپورتینی رواجلنتیریش، یوکلرنی تشیشنی آسانلشتیریش و افغانستان بیلن منطقه دولتلری اۉرته‌سیده‌گی سودا-ساتیقنی کېنگه‌یتیریش مقصدیده عملگه آشیریلگنینی ایتگن.
طالبلرنینگ هراتده‌گی حاکملیک اداره‌سی‌نینگ معلوم قیلیشیچه، هرات–خواف تېمیر یۉلی‌نینگ تۉرتینچی قِسمی‌نینگ بیرینچی باسقیچی ۴۳ کیلومتر اوزونلیککه اېگه بۉلیب، ۵۸.۵ میلیون دالر مبلغ عوضیگه قوریلگن.
خواف–هرات تېمیر یۉلی ۲۲۶ کیلومتر اوزونلیککه اېگه بۉلیب، اونینگ ۷۷ کیلومتری ابران حدودیده، ۱۴۹ کیلومتری اېسه افغانستان توپراغیده جایلشگن.
اوشبو تېمیر یۉل‌نینگ ایرانده جایلشگن ایکّی قِسمی و افغانستانده‌گی اوچینچی قِسمی‌نینگ قوریلیشی یکونلنگن.
تېمیر یۉل‌نینگ تۉرتینچی قِسمی ۴۳ و ۴۷ کیلومتر اوزونلیکده‌گی ایکّی باسقیچدن عبارت بۉلیب، یکونده هرات صناعت پارکیگچه یېتیب باره‌دی.
طالبلر اوشبو قِسم نینگ ایکّینچی باسقیچی قوریلیشینی ۱۴۰۴-هجري-شمسي ییل‌نینگ ۲۲- سنبله کونی ایکّینچی مرته باشله‌گن.
