افغانستان خبرچیلر مرکزی افغانستان‌ده اخباراتگه کیریش حقوقی مثلی کۉریلمه‌گن درجه‌ده باستیریله‌یاتگنینی و عملده یۉق قیلینگنینی بیلدیردی.
مرکز بوگون (دوشنبه، ۶- میزان) «خلق‌ارا اخباراتگه کیریش کونی» مناسبتی بیلن بیانات بېریب، شونده‌ی دېدی: «بوگون افغانستان خلقی اوروش سببلی اېمس، بلکه رسمي و اته‌یلب آلیب باریله‌یاتگن سیاست طفیلی مطلق اخبارات قارانغولیگیده یشه‌ماقده».
افغانستان خبرچیلر مرکزی قۉشیمچه قیلدی: «طالبان حکومتی بیلیش حقوقیگه قرشی اوروش اعلان قیلگن. بو اوروش ژورنالیستلرنینگ آوازینی اۉچیردی، خلق اوچون ضرور بۉلگن اخباراتنی کېسکین چېکله‌دی و خلق‌نینگ خبردار بۉلیش اساسي حقوقیدن محروم قیلدی».
مرکزنینگ ایتیشیچه، اونینگ حجتلشتیریلگن معلوماتلری طالبلر تامانیدن مملکتده «امر به معروف و نهی از منکر» قانونی اجرا اېتیلیشی بیلن ژورنالیستلر و رسانه‌لذ فعالیتیگه قۉییلگن چېکلاولر تیزیملی روشده کوچه‌یگنینی کۉرسه‌ته‌دی.
مرکز، جمله‌دن، ناراضیلیک نمایشلری، میتینگلر و هر قنده‌ی مخالف آوازنی عامه‌وي اخبارات واسطه‌لریده یاریتیشنی تۉلیق تعقیقلش؛ کانتینت اوستیدن نظارت اۉرنه‌تیش و ینگیلیکلرنی اعلان قیلیشدن آلدین تصدیق آلیش مجبوريه‌تینی یوکلش؛ خلق‌ارا تلویزونلرنینگ دستورلرینی نشراتگه اوزه‌تیش و قَیته ترقه‌تیشنی تعقیقلش؛ دولت رسانه‌لریده عیال ژورنالیستلرنینگ ایشلشینی تعقیقلش؛ خصوصي و مستقل ییتکرمه‌لرده عیاللر فعالیتیگه قۉییلگن چېکلاولرنی کېنگه‌یتیریش؛ تیریک موجوداتلرنینگ تصویرلرینی اعلان قیلیشنی تعقیقلش؛ واقعه‌لرنی اېرکین و مستقل یاریتیشگه اورینگنی یاکه خارجده فعالیت یوریته‌یاتگن رسانه‌لر بیلن علاقه قیلگنی اوچون ژورنالیستلرنی حبسگه آلیش، تهدید قیلیش و تعقیب اېتیش حالتلرینی قید اېتگن.
افغانستان ژورنالیستلری مرکزی خلق‌ارا اخباراتگه کیریش کونی مناسبتی بیلن طالبلردن برچه فرمان و چېکلاولرنی بېکار قیلیشنی، ییتکرمه‌نی سانسور قیلیش همده ژورنالیستلرنی تهدید و حبسگه آلیشگه برهم بېریشنی سۉردی.
شونینگدېک، اوشبو تشکیلات خلق‌ارا همجعیتدن افغانستان‌نینگ مستقل ییتکرمه‌لرب و خوف آستیده‌گی ژورنالیستلرنی عملي و زودلیک بیلن قۉللب-قوّتلشنی سۉره‌دی.
طالبلر افغانستان اوستیدن قَیته نظارت اۉرنه‌تگنیدن بېری ژورنالیستلر و رسانه فعالیتیگه کېنگ کۉلملی چېکلاولر جاري قیلگن.
بو گروه بیر نېچه بار ییتکرمه اداره‌لریگه باستیریب کیریب، ژورنالیستلر و خادملرنی حبسگه آلگن همده رسانه اداره‌لریی یاپگن.
