افغانستان خبرچیلر مرکزی طالبلر عدلیه وزیرلیگی کوچلری کابل‌ده «افغان آوازی» (آوا) اخبارات آژانسی و «تبیان» مدنیت مرکزینی یاپگنینی معلوم قیلدی.
اوشبو مرکز خبردار منبعلرگه ته‌یه‌نیب یازیشیچه، طالبلر عدلیه وزیرلیگی کوچلری اۉتگن هفته پنج‌شنبه کونی (ث میزان) کابل شهری‌نینگ دشت برچی منطقه‌سیده‌گی «افغان آوازی» اخبارات آژانسی و «تبیان» مدنیت مرکزی اداره‌لرینب یاپگن.
افغانستان خبرچیلر مرکزی، شونینگدېک، شو هفته شنبه کونی «افغان آوازی» اخبارات آژانسی ژورنالیستی ضامن علی چاووشي و «تبیان» مرکزی‌نینگ بېش نفر خادمی طالبلر عدلیه وزیرلیگیگه چقیریلگنی و وزیرلیککه کیرگنلریدن سۉنگ حبسگه آلینگنینی بیلدیرگن.
افغانستان ژورنالیستلر مرکزی «افغان آوازی» اخبارات آژانسی اداره‌سی‌نینگ یاپیلیشی و اوشبو میدیا خادمی ضامن علی چاووشي‌نینگ حبسگه آلینیشینی کېسکین قاره‌لب، طالبلردن ژورنالیستنی امکان قدَر تېزراق و هېچ قنده‌ی شرطسیز آزاد قیلیشنی سۉره‌گن.
مرکز، شونینگدېک، «افغان آوازی» فعالیتینی قَیته تیکلش و اونینگ خادملریگه تهدید همده حبسگه آلینیشی خوفیسیز اېرکین فعالیت یوریتیش امکانینی بېریشنی طلب قیلگن.
«تبیان» مدنیت مرکزی و «افغان آوازی» (آوا) اخبارات آژانسی سید عیسی حسینی مزارینی باشقه‌ره‌دی. او اۉز نطقلریده بیر نېچه بار طالبلر سیاستینی قۉللب-قوّتله‌گن.
طالبلر حسینی مزاريگه تېگیشلی مدنیت مرکزی و میدیا تشکیلاتینی نیمه سببدن یاپگنی حاضرچه معلوم اېمس. طالبلر عدلیه وزیرلیگی حاضرگچه بو باره‌ده ایضاح بېرمه‌گن.
طالبلر سۉنگگی کونلرده کابل‌نینگ شیعه اهالیسی استقامت قیله‌دیگن حدودلریده بیر نېچته دیني و تعلیم مرکزلری همده بیرته طبیات مرکزینی یاپگن.
