فاطمه زهرا منصوری حزبی مراکش پارلمان سیلاولریده غلبه قازانگنیدن سۉنگ، مملکت تاریخیده باش وزیر لوازمینی اېگه‌لله‌گن ایلک عیال بۉلدی.
مراکش قیراللیک سرایی بیاناتیده ایتیلیشیچه، مملکت قیرالی محمد وی سه‌شنبه کونی (۷ـ میزان) فاطمه زهرا منصورينی باش وزیر اېتیب تعیینله‌گن.
مراکش قیراللیک سرایی بیاناتیده قید اېتیلیشیچه، قیرال محمد وی خانم منصورينی باش وزیر اېتیب تعیینلب، اونگه ینگی حکومتنی شکللنتیریش وظیفه‌سینی تاپشیرگن.
فاطمه زهرا منصوری «اصالت و زمانه‌ويلیک» حزبی رهبری حسابلنه‌دی. اوشبو حزب اۉتگن هفته بۉلیب اۉتگن پارلمان سیلاولریده وکیللر پله‌ته‌سیده‌گی جمع‌ی ۳۹۵ ا‌ۉریندن ۹۷ ته‌سینی قۉلگه کیریتگن.
اوّلگی حکومتگه رهبرلیک قیلگن «ملي مستقللر ییغینی» حزبی ۳۶ ته ا‌ۉریندن اَیریلیب، ۶۶ته ا‌ۉرین بیلن ایکّینچی ا‌ۉریننی اېگه‌لله‌گن. «استقلال» حزبی اېسه ۶۵ ته ا‌ۉرین بیلن مراکه‌ش پارلمانیده اوچینچی ا‌ۉریننی آلگن.
هېچ بیر حزب پارلمانده‌گی ۱۹۸ ا‌ۉرینلیک مطلق کۉپچیلیککه اېگه بۉلمه‌گنی سببلی، فاطمه زهرا حکومتنی شکللنتیریش اوچون باشقه حزبلر بیلن مذاکره آلیب باریشی کېره‌ک. او اوّلراق ائتلاف مذاکره‌لریده «قیزیل چیزیق» یۉقلیگینی ایتگن اېدی.
۵۰ یاشلی منصوري حقوقشناس. او اوّل شهرسازلیک و اوی-جای وزیری همده مراکش شهری والیسی لوازملریده ایشله‌گن. او ۲۰۰۹-ییلده مراکشده ایلک عیال والی اېتیب سه‌یلنگن و ۲۰۲۱ییلگی سیلاولردن سۉنگ ینه اوشبو لوازمنی اېگه‌لله‌گن.
فاطمه زهرا، شونینگدېک، ۲۰۲۱-ییلدن بویان مراکش حکومتیده حدودي رېجه‌لشتیریش، شهرسازلیک، اوی-جای و شهر سیاستی وزیری لوازمیده فعالیت یوریتگن.
اونینگ باش وزیر اېتیب تعیینلنیشی بیلن مراکش تونیسدن کېین عرب دنیاسیده حکومت رهبری لوازمینی عیال اېگه‌لله‌گن ایکّینچی دولتگه ایلندی. تونیسده نجلا بودېن ۲۰۲۱-ییل اکتوبردن ۲۰۲۳-ییل اگوستگچه باش وزیر لوازمیده ایشله‌گن.
