افغانستان‌نینگ سابق جمهور رییسی حامد کرزی پاکستان‌نینگ کنر و هلمند ولایتلریگه اویوشتیرگن هجوملرینی اېنگ کېسکین سۉزلر بیلن قاره‌لشینی ایتدی.
جناب کرزی بوگون (پنج‌شنبه، ۹میزان) ایکس اجتماعي ترماغیده نشر قیلگن بیاناتیده: «پاکستان حربيلری‌نینگ تجاوزینی افغانستان توپراغیگه باستیریب کیریش و اونینگ حاکمیتینی بوزیش دېب حسابله‌یمن همده تأکیدله‌یمنکی، افغانستان خلقی تشقی تجاوزگه قرشی وطنینی حمایه قیلیش اوچون بیردم بۉله‌دی»، دېب یازگن.
افغانستان‌نینگ سابق جمهور رییسی شونینگدېک، «پاکستان رهبرلریگه افغان عیاللری و باله‌لرینی اۉلدیریش همده عیبنی باشقه‌لرگه یوکلش اۉرنیگه، اۉزلری‌نینگ تجاوزکار سیاستی و دشمنانه رېجه‌لرینی قَیته کۉریب چیقیب، اېکسترېمیزمنی ترغیب قیلیش و نفاق سالیشدن واز کېچیشنی توصیه قیله‌دی»، دېب تأکیدله‌گن.
او پاکستان رهبرلرینی «افغانستان بیلن یخشی قۉشنیچیلیک و سیویلیزه‌تسيه‌لشگن مناسبتلر اساسیده ملاقات قیلیشگه» چقیرگن.
پاکستان اوردوسی بوگون تانگده ینه افغانستانده‌گی نشانلرگه هجوم قیلدی. طالبلرنینگ سۉزچیسی ذبیح‌الله مجاهد نینگ ایتیشیچه، «پاکستان اوچاقلری کنر ولایتی‌نینگ شلتن تومنیده‌گی چوگام و هلمندنینگ گرمسیر تومنیده‌گی سفر حدودلریده تینچ اهالی اویلرینی بامباردمان قیلگن. هجوملرده ۹ کیشی عیال و باله هلاک بۉلگن، ۱۱ کیشی یره‌لنگن و ۳ ته اوی ویران قیلینگن».
بیراق پاکستان اخبارات و نشرات وزیرلیگی «غضب الحق» عملیاتی دایره‌سیده افغانستانده‌گی ایکّی حدودده ترورچی تشکیلاتلرنینگ «فتنه الخوارج» و «فتنه الهندستان» دېب اته‌لگن یشیرین مسکنلری و خوفسیز باش‌پناه‌لریگه قرشی رېجه‌لشتیریلگن و انیق هوا هجوملری عملگه آشیریلگنینی معلوم قیلگن.
مذکور وزیرلیک هجوملرده ۲۲ نفر ترورچی اۉلدیریلگنی، شونینگدېک، یشیرین مسکنلرده سه‌قلنگن کتّه مقدارده‌گی قورال-یراغ و اۉق-داریلر یۉق قیلینگنینی بیلدیرگن.
بو سۉنگگی ایکّی هفته ایچیده پاکستان‌نینگ افغانستانده‌گی نشانلرگه اوچینچی مرته هجوم قیلیشی حسابلنه‌دی. پاکستان ترورچیلرنینگ یشیرین مسکنلرینی نشانگه آلگنینی اَیتماقده، طالبان اېسه هجوملرده تینچ اهالی اویلری نشانگه آلینگنینی بیلدیرماقده.
