بیرلشگن ملتلر تشکیلاتی‌نینگ افغانستانده‌گی یاردم اداره‌سی (یوناما) پاکستان نامینی تیلگه آلمه‌گن حالده، بوگون (پنج‌شنبه، ۹-میزان) کنر و هلمند ولایتلریده عملگه آشیریلگن هوا هجوملریده کمیده ۱۰ کیشی تینچ اهالی هلاک بۉلگنی و ینه تۉقّیز نفری یره‌لنگنینی معلوم قیلدی.
یوناما ایکس ترماغیده بیانات نشر قیلیب، هلاک بۉلگنلرنینگ اکثریتی باله‌لر بۉلگنینی و تینچ اهالی همان چېگره‌الدی تۉقنه‌شوولریدن تأثیرلنه‌یاتگنینی بیلدیرگن.
بیرلشگن ملتلر تشکیلاتی‌نینگ افغانستانده‌گی یاردم اداره‌سی «کېسکینلیکنی کمه‌یتیریش، ملاقات آلیب باریش، خلق‌ارا حقوققه حرمت بیلن قره‌ش و تینچ اهالیگه بوندن آرتیق ضرر یېتیشی‌نینگ آلدینی آلیش ضرورلیگینی» ینه بیر بار تأکیدله‌گن.
پاکستان بوگون تانگده کنر و هلمند ولایتلریده‌گی نشانلرگه هجوم قیلگن. طالبلر سوزلاوچیسی ذبیح‌الله مجاهدنینگ ایتیشیچه، پاکستان اوچاقلری کنرنینگ شلتن اولسواللیگی‌ده‌گی چوگام منطقه‌سی و هلمندنینگ گرمسېر اولسواللیگی سفر منطقه‌سیده عادي اهالی‌نینگ اویلرینی بامباردمان قیلگن. نتیجه‌ده عیاللر و باله‌لرنی هم قۉشیب، تۉقّیز کیشی هلاک بۉلگن، ۱۱ کیشی یره‌لنگن و اوچته اوی ویران قیلینگن.
بیراق پاکستان.نینگ اخبارات و نشرات وزیرلیگی «غضب-الحق» عملیاتی‌نینگ دوامی دایره‌سیده افغانستان نینگ ایکّی حدودیده «فتنه-خوارج» و «فتنه-هندستان» دېب اته‌لگن ترورچی تشکیلاتلر نینگ یشیرین جایلری و خوفسیز باش‌پناه‌لریگه رېجه‌لشتیریلگن همده انیق هوا هجوملری عملگه آشیریلگنینی معلوم قیلگن.
وزیرلیک.نینگ ایتیشیچه، اوشبو هجوملرده ۲۲ کیشی ترورچی اۉلدیریلگن. شونینگدېک، یشیرین جایلرده سقلنگن کتّه مقدارده‌گی قورال-یراغ و اۉق-داریلر هم یۉق قیلینگن.
