افغانستان‌نینگ بیرلشگن ملتلر تشکیلاتیدهگی نماینده‌لیگی ایکس پرستی نصیر احمد فایق پاکستان‌نینگ کنر و هلمند ولایتلریگه اویوشتیرگن هوا هجوملرینی قاره‌له‌دی.
جناب فایق بوگون (پنج‌شنبه، ۹-میزان) ایکس ترماغیده پُست نشر قیلیب، «افغانستان اهالیسی پاکستان و طالبان اۉرته‌سیده‌گی پاکستان طالبلر حرکتی (تی‌تی‌پی) مسأله‌سیده‌گی ماجرانینگ بدلینی تۉله‌مسلیگی کېره‌ک»، دېب یازگن.
افغانستان‌نینگ بیرلشگن ملتلر تشکیلاتی نماینده‌گی سرپرستی شونده‌ی دېگن: «شونینگدېک، افغانستان و منطقه‌نی خوف آستیگه قۉیه‌یاتگن ترورچی گروهلرگه، جمله‌دن، پاکستان طالبان حرکتیگه باش‌پناه بېریش و اولرنی قۉللب-قوّتلش باره‌سیده‌گی طالبان سیاستینی قاره‌له‌یمن».
اونینگ ایتیشیچه، «تروریزمگه قرشی ثمره‌لی و برقرار کوره‌ش افغانستان‌ده قانوني، اینکلیوزیو و حسابدار باشقروونی طلب قیله‌دی».
افغانستان‌نینگ بیرلشگن ملتلر تشکیلاتیدهگی وکالت‌خانه‌سی سرپرستی شونینگدېک، «تروریزمگه قرشی کوره‌ش تینچ اهالیگه ضرر یېتکزیش یاکه افغانستان‌نینگ حدودي یخلیتلیگینی بوزیش اوچون بهانه بۉله آلمه‌یدی»، دېگن.
او «چېگره‌لر ارا تۉقنه‌شوولرنی زودلیک بیلن توخته‌تیش، تینچ اهالینی حمایه قیلیش و خلق ارا حقوققه تۉلیق رعایه اېتیش»گه چقیرگن.
پاکستان بوگون تانگده کنر و هلمند ولایتلریده‌گی نشانلرگه هوا هجومی اویوشتیردی. بیرلشگن ملتلر تشکیلاتی‌نینگ افغانستانده‌گی یاردم اداره‌سی (یوناما)نینگ معلوم قیلیشیچه، اوشبو ایکّی ولایتده ۱۰ نفر تینچ اهالی، اولرنینگ اکثریتی باله‌لر، هلاک بۉلگن و ینه تۉقّیز کیشی یره‌لنگن.
طالبلر هم اوشبو هجوملرده تۉقّیز نفر تینچ اهالی هلاک بۉلگنی و ینه ۱۱ کیشی یره‌لنگنینی معلوم قیلگن.
پاکستان اېسه «فتنه الخوارج» و «فتنه الهندستان» دېب اته‌گن ترورچی تشکیلاتلرنینگ یشیرین جایلری و خوفسیز باش‌پناه‌لرینی نشانگه آلگنینی همده ۲۲ نفر «ترورچی»نی اۉلدیرگنینی بیلدیرگن.
