روسيه تشقی ایشلر وزیرلیگی افغانستان بۉییچه «مسکو فورمتی» نینگ سکّیزینچی ییغیلیشی کېله‌سی هفته‌‌نینگ دوشنبه کونی (۱۳-میزان) اوشبو مملکت پایتختیده اۉتکزیلیشینی معلوم قیلدی.
روسيه تشقی ایشلر وزیرلیگی مطبوعات سوزلاوچیسی ماریا زخاراوا افغانستان نامیدن طالبان‌نینگ تشقی ایشلر وزیری امیرخان متقي اشتراک اېتیشینی ایتدی.
اونینگ قۉشیمچه قیلیشیچه، ییغیلیش روسيه تشقی ایشلر وزیری سرگی لاوروف‌نینگ نطقی بیلن آچیله‌دی.
ییغیلیشده هندستان، ایران، قازاقستان، چین، قیرغیزستان، پاکستان، روسيه، تاجیکستان و اۉزبېکستان نینگ مخصوص وکیللری همده یوقاری مرتبه‌لی عملدارلری اشتراک اېتیشی کوتیلماقده.
روسيه تشقی ایشلر وزیرلیگی مطبوعات سوزلاوچیسی بلاروس و مصردن عبارت هیئتلر هم مهمان صفتیده تکلیف قیلینگنینی ایتدی.
ماربا زاخاورانینگ ایتیشیچه، طالبان تشقی ایشلر وزیری ییغیلیش دایره‌سیده روسيه تشقی ایشلر وزیری بیلن اوچره‌شیب، دالضرب مسأله‌لر و ایکّی تامانله‌مه همکارلیکنی محاکمه قیله‌دی.
اونینگ سۉزلریگه کۉره، منطقه دولتلری و افغانستان اۉرته‌سیده‌گی سیاسي و اقتصادي علاقه‌لر، شونینگدېک، تروریزم و گیاهوند مادّه‌لر سوداسیگه قرشی کوره‌شیش باره‌سیده‌گی منطقوي همکارلیکنی کوچه‌یتیریش اوشبو ییغیلیشده‌گی محاکمه‌لر نینگ اوستوار یۉنه‌لیشلری بۉله‌دی. ییغیلیش یکونیده قۉشمه بیانات هم قبول قیلینه‌دی.
بو طالبلرنینگ «مسکو فورمتی» ییغیلیشیده رسمي اعضا صفتیده کېتمه-کېت ایکّینچی ییل اشتراک اېتیشیدیر. اوّلراق گروه‌نینگ تشقی ایشلر وزیری ییغیلیشلرده مهمان صفتیده قتنه‌شگن.
حاضرده روسيه طالبلر حکومتینی افغانستانده رسماً تن آلگن و اوشبو گروه بیلن رسمي دیپلوماتیک علاقه‌لر اۉرنه‌تگن دنیاده‌گی یگانه دولت حسابلنه‌دی.
