افغانستان‌نینگ حاضر طالبلر نظارتیده بۉلگن طبيعي آفتلرگه قرشی کوره‌ش ملي اداره‌سی چاآب اولسواللیگی‌نینگ سمتی قیشلاغیده‌گی کانده قملیب قالگن ۱۰ کیشی کانچی ساغ-سلامت قوتقریلگنینی معلوم قیلدی.
اوشبو اداره بوگون کېچقورون (پنج‌شنبه، ۹ میزان) نشر قیلگن بیاناتیده ایتیشیچه، تخار ولایتیده‌گی طبيعي آفتلرگه قرشی کوره‌ش اداره‌سی‌نینگ تخنیکي گروهلری حادثه‌دن سۉنگ درحال قوتقروو ایشلرینی باشله‌گن و ضرور احتیاطکارلیک همده چاره‌لر کۉریش آرقه‌لی برچه کانچیلر گنینگ حیاتینی سه‌قلب قالگن.
بو ایشچیلر سه‌شنبه کونی توشدن کېین تخارنینگ چاآب اولسواللیگی‌‌ده آلتین کانی‌نینگ قوله‌شی عاقبتیده ویرانه‌لر آستیده قالیب کېتگن اېدی.
حاضر طالبلر نظارتیده بۉلگن دولتگه قره‌شلی باختر اخبارات آژانسی کېچه اوشبو حادثه حقیده خبر بېریب، ایشچیلرنی قوتقریش حرکتلری دوام اېته‌یاتگنینی معلوم قیلگن اېدی.
حاضرچه کان‌نینگ قنده‌ی قیلیب قوله‌گنی نامعلوم. طالبلرنینگ طبيعي آفتلرگه قرشی کوره‌ش اداره‌سی هم بو باره‌ده معلومات بېرمه‌گن.
افغانستان کانلریده قوله‌ش، گازدن زهرلنیش و پارتلش کبی حادثه‌لر تېز-تېز اوچره‌ب توره‌دی. معیارلرگه جواب بېرمه‌یدیگن قزیب آلیش ایشلری و خوفسیزلیک قاعده‌لریگه رعایه قیلمسلیک بونده‌ی هلاکتلی حادثه‌لر نینگ اساسي سببلریدن بیری صفتیده کۉرسه‌تیله‌دی.
