بیرلشگن ملتلر تشکیلاتی‌نینگ انسان حقوقلری کېنگشی‌نینگ افغانستان بۉییچه مخصوص گزارشگری ریچارد بنت، پاکستان‌نینگ افغانستانده‌گی هجوملری وقتیده تینچ اهالی‌نینگ اۉلدیریلیشی یوزه‌سیدن جوابگرلیک مسأله‌سی جوده مهم اېکنینی ایتدی.
بنت بوگون (جمعه، ۱۰-میزان) اېرته‌لب ایکس ترماغیده نشر قیلگن خبریده، اوشبو تۉقنه‌شووده تینچ اهالی‌نینگ اۉلدیریلیشی اوچون هېچ قنده‌ی آقلاو یۉقلیگینی ایتدی.
او شونده‌ی دېدی: «تینچ اهالی، جمله‌دن باله‌لر هم هلاک بۉلگن نوبتده‌گی هوا هجومیدن سۉنگ، جوابگرلیک مسأله‌سی جوده مهم‌دیر.»
ریچارد بنت: «بو قابلیتسیزلیک، بې‌پروالیکنی یاکه بوندن هم یامانراق نرسه‌می؟» دېب سوال بېردی.
او قۉشیمچه قیلدی: «نیمه بۉلیشیدن قطع نظر، تینچ اهالیگه بونده‌ی اۉرنینی قاپلب بۉلمه‌یدیگن ضرر یېتکزیش اوچون هېچ قنده‌ی آقلاو یۉق و بو انسان حقوقلری همده خلق‌ارا گومانیتار حقوق‌نینگ بوزیلیشی بۉلیب کۉرینماقده.»
بو آره‌ده، پاکستان کېچه تانگده کنر و هلمند ولایتلریده‌گی نشانلرگه هوا هجوملرینی عملگه آشیردی.
پاکستان اخبارات و نشرات وزیرلیگی «فتنه خوارج» و «فتنه هندستان» دېب اته‌گن ترورچیلیک تشکیلاتلری‌نینگ یشیرین جایلری و خوفسیز باش‌پناه‌لری نشانگه آلینگنینی، نتیجه‌ده ۲۲ نفر ترورچی اۉلدیریلگنینی معلوم قیلدی.
اما طالبان مطبوعات سوزلاوچیسی ذبیح‌الله مجاهدنینگ ایتیشیچه، پاکستان اوچاقلری کنر ولایتی‌نینگ شلتن اولسواللیگیده‌گی چوگام و هلمندنینگ گرمسېر تومنیده‌گی سفر حدودلریده تینچ اهالی‌نینگ اویلرینی بامباردمان قیلگن. اونینگ سۉزلریگه کۉره، تۉقّیز کیشی، جمله‌دن عیاللر و باله‌لر هلاک بۉلگن، ۱۱ کیشی یره‌لنگن و اوچته اوی ویران قیلینگن.
بیرلشگن ملتلر تشکیلاتی‌نینگ افغانستانده‌گی یاردم اداره‌سی (یوناما) پاکستان نامینی تیلگه آلمه‌گن حالده، هجوملرنی تصدیقله‌دی و بو هجوملرده کمیده ۱۰ کیشی تینچ فقرا هلاک بۉلگنی، ینه تۉقّیز نفر تینچ فقرا یره‌لنگنینی معلوم قیلدی.
