سعوديه عربستانی پولیسی مکه شهریده‌گی مسجدالحرام ایچیدن بیر کیشی‌نینگ حبسگه آلینگنینی تصدیقلب، اۉز جانیگه قصد قیلیشگه تیارلنگن هجومچی بۉلگنی حقیده‌گی خبرلرنی رد اېتدی.
سعوديه عربستانی جماعت خوفسیزلیگی پولیسی بوگون (جمعه، ۱۰ میزان) اېرته‌لب بیانات بېریب، بیر کیشی‌نینگ یۉلاوچیلرنی بېزاوته قیلگنی اوچون حبسگه آلینگنینی معلوم قیلدی.
تیناوون اجتماعي ترماقلرده گۉیاکه کعبه ایچیده هجوم اویوشتیرماقچی بۉلگن خودکوش-ترورچی قۉلگه آلینگنی حقیده میش-میشلر ترقه‌لگن اېدی.
بیراق سعوديه عربستانی بو میش-میشلرنی رسماً رد اېتدی.
پولیس بیاناتیده شونده‌ی دېییله‌دی: «مسجدالحرامده‌گی خوفسیزلیک خادملری یۉلاوچیلرنی بېزاوته قیلگن، اولر آره‌سیده قۉرقوو و خواطر اویغاتگن شخصنی قۉلگه آلدی و اونگه نسبتاً درحال ضرور حقوقي چاره‌لر کۉریلدی.»
اجتماعي ترماقلرده مسجدالحرام ایچیده خوفسیزلیک خادملری تامانیدن بیر کیشی‌نینگ حبسگه آلینیشی همده واقعه جاییده‌گی آدملرنینگ قیچقیره‌یاتگنینی عکس اېتتیرگن ویدیو ترقه‌لماقده.
شو بیلن بیرگه، اۉتگن ییللرده‌گی خوفسیزلیک حادثه‌لری و شونگه اۉخشش میش-میشلرگه عاید ویدیولر هم ینگی واقعه صفتیده اجتماعي ترماقلرده قَیته ترقه‌تیلماقده.
