امریکا عدلیه وزیرلیگی افغانستان وطنداشی «دلبرگل دلبر» اسملی باش‌پناه ایزلاوچی امریکانینگ مخصوص مهاجرت ویزه‌سی (اس آی وی)نی آلیشده ساخته‌لیک قیلگنی اوچون آلتی آیگه قماق جزاسیگه حکم قیلینگنینی معلوم قیلدی.
وزیرلیک پنج‌شنبه کونی (۹-میزان) نشر قیلگن بیاناتیده ایتیلیشیچه، افغانستان وطنداشی‌نینگ ایشی نیویورکده‌گی فرانک پی.جراس. محلي محکمه‌سیده کۉریب چیقیلگن و او «ویزه آلیش اوچون فریبگرلیک» عیبلاوی بۉییچه عیبدار دېب تاپیلگن.
دلبرگل ۲۰۲۴-ییلده امریکاگه کیرگن و دایمي یشش حقوقینی هم آلگن.
وزیرلیک بیاناتیگه کۉره، دلبرگل دستلب ۲۰۱۷-ییلده کابلدهگی امریکا اېلچیخانه‌سیگه، کېین اېسه ۲۰۲۱-ییلده آنلاین طرزده مخصوص مهاجرت ویزه‌سینی آلیش اوچون عریضه تاپشیرگن.
امریکا عدلیه وزیرلیگی‌نینگ معلوم قیلیشیچه، بو افغانستان وطنداشی هر ایکّی سفر تقدیم اېتگن معلوماتلری‌نینگ تۉغریلیگیگه قسم‌یاد قیلگن. بیراق اوشبو حجتلر دلبرگلدن پول آلگن شخصلر تامانیدن تۉلدیریلگن. اونینگ اۉزی هم امریکا دیپلوماتیک وکالت‌خانه‌سی تامانیدن تصدیقلنگنی حقیده ساخته و قلبه‌کیلشتیریلگن خطلر، شونینگدېک، عریضه‌سیده‌گی حقیقتگه ضد معلوماتلردن خبردار بۉلگن.
دلبرگل دلبر اۉتگن ییل نینگ ثور آییده حبسگه آلینگن.
اۉشه پیتده آمریکا دادستانی بو افغانستان وطنداشی امریکانینگ مخصوص مهاجرت ویزه‌سینی (اس آی وی) آلیش اوچون عریضه‌سینی تصدیقلش مقصدیده ساخته حجتلر، جمله‌دن، آمریکانینگ کابلدهگی اېلچیخانه‌سی نامیدن بېریلگنی کۉرسه‌تیلگن ساخته توصیه‌نامه و امریکا‌ده جایلشگن کمپنیده ایشله‌گنینی تصدیقلاوچی قلبه‌کی ایش تجربه‌سی حجتینی تقدیم اېتگنینی معلوم قیلگن.
